रामेछाप- रामेछापमा सडक दुर्घटनामा परी दुई जनाको ज्यान गएको छ भने दुई जना घाइते भएका छन् । सोमबार भएका छुट्टछुट्टै दुई सडक दुर्घटनामा दुई जनाको ज्यान गएको छ भने दुई जना घाइते भएका छन् ।
सोमबार बिहान करिब ६ बजेको समयमा मन्थली नगरपालिका वडा नं ७ मुगीटारबाट मन्थली तर्फ आउँदै गरेको बा.प ०१–००६ ख ३८३९ नम्बरको बालुवा लोड भएको टिपर मन्थलीकै वडा नं ७ पोडेदह स्थित मन्थली–मुगीटार सडक खण्डमा दुर्घटना हुँदा टिपर चालक पबित्र बस्नेतको ज्यान गएको जिल्ला प्रहरी कार्यालय रामेछापका प्रहरी प्रमुख प्रहरी नायव उपरीक्षक प्रदिप कुमार सिंहले बताए । टिपरका सहचालक मनोज फुयाल भने घाइते भएका छन् । घाइतेलाई सामान्य उपचार पश्चात् थप उपचारको लागि काठमाण्डौ पठाइएको प्रनाउ सिंहले बताए ।
मृतक टिपर चालक पबित्र बस्नेतको ठेगाना रामेछापको गोकुलगंगा गाउँपालिका वडा नं ३ रहेको र घाइते सहचालकको ठेगाना दोलखाको तामाकोशी गाउँपालिका वडा नं ६ च्यामा रहेको प्रहरी प्रमुख सिंहले बताए । टिपर सडकबाट करिब ५० मिटर तल खसेको बताइएको छ ।
त्यस्तै सोमबार दिउँसो रामेछापको खाँडादेवी गाउँपालिका वडा नं ३ भिरपानीमा मोटरसाइकल दुर्घटना हुँदा मोटरसाइकलमा सवार २१ वर्षका अशोक नेपालीको ज्यान गएको छ भने मोटरसाइकलमा पछाडि सवार ३० वर्षका सन्जित दर्जी घाइते भएका छन् । तिल्पुङबाट काठमाण्डौ जाँदै गरेको बा ८९ प ४३८२ नम्बरको मोटरसाइकल सडकबाट करिब ५० मिटर तल खसेर मोटरसाइकलमा सवार मध्ये एकको ज्यान गएको र अर्का एक जना घाइते भएको प्रनाउ सिंहले बताए । सिंहका अनुसार मोटरसाइकल दुर्घटनामा ज्यान गुमाउनेको ठेगाना मन्थली नगरपालिका वडा नं ३ कठजोर रहेको र अर्का घाइतेको ठेगाना दोलखाको मेलुङ गाउँपालिका वडा नं २ रहेको छ ।
मोटरसाइकल दुर्घटनामा घाइते भएका दर्जीको खाल्डेमा रहेको अस्पतालमा उपचार भइरहेको र मृतक नेपालीको शव मन्थली ल्याउने कार्य भइरहेको प्रहरीले बताएको छ ।
एकै दिन भएका दुई दुर्घटनाको बारेमा अनुसन्धान भइरहेको प्रहरी प्रमुख सिंहले बताए ।
