रामेछाप- रामेछाप र सोलुखुम्बुको सिमाना भएर बग्ने लिखु नदीमा निर्माणाधीन अवस्थामा रहेको लिखु-२ जलविद्युत आयोजनाको लापरबाहीले घाटमा जलाउँदै गरेको लास नदीले बगाएको छ । रामेछापको उमाकुण्ड गाउँपालिका वडा नं १ गुम्देलका एक स्थानीयको लास शनिवार साँझ बाल्दिङस्थित मार्बु दोभानमा रहेको घाटमा जलाउने क्रममा आयोजनाले स्थानीलाई थाहा नदिई पानीको बहाव बढ्ने गरी पानी खोलिदिएपछि जलाउँदै गरेको लास बगाएको हो ।
अन्य बेला नदीलाई पूर्ण रूपमा सुकाएर सुरुङ मार्ग मार्फत सबै पानी विद्युत् उत्पादनको लागि लैजाने जलविद्युत आयोजनाले शनिवार भने नदी किनारमा रहेका (मलामी) स्थानीयलाई जानकारी नदिई ठुलो पानी छोडेको कारण जल्दै गरेको लास बगाएको स्थानीय राजेन्द्र बस्नेतले बताए । घाट स्थलमा रहेका बस्नेतले घटनाको बारेमा जानकारी दिँदै भने- ‘हामी दिउँसो करिब ३ बजे देखि नै घाट स्थलमा छौँ । हामी यहाँ भएको जानकारी आयोजनालाई पनि पूर्ण रूपमा छ । साँझ ५ बजे पछि लास जलाउन सुरु गरेका थियौँ, लास जलिरहेको बेला करिब साढे ६ बजेको समयमा नदी बगेर आयो अनि जल्दै गरेको लास बगाएर लग्यो ।’
लास सँगै मृतकका दाजुभाइले नदी किनारमा फुकालेर राखेको कपडासँगै ब्याग समेत बगाएको बस्नेतले बताए । बस्नेतका अनुसार ब्यागमा रहेको नगद पैसा, चेक बुक र अन्य महत्त्वपूर्ण सामाग्री पनि नदीले बगाएको छ ।
लास नदी किनारमा लैजाने बेला आयोजनाका इन्चार्ज सञ्जीव खनाल गाडी लिएर भाग्न खोजेको र उनको त्यो गतिविधिले यो घटना नियोजित भएको स्थानीय राजेन्द्र बस्नेतले दाबी गरे ।
घटनाको बारेमा आयोजनामा बुझ्दा मेसिन बिग्रेर तत्काल आइपरेको समस्याले गर्दा पानी गएको भन्ने जानकारी आफूले पाएको रामेछापका प्रमुख जिल्ला अधिकारी अनिता निरौलाले बताइन् । घटना स्थलको नजिक सोलुखुम्बुको सुरक्षा निकाय रहेकाले घटना कसरी घट्यो भन्ने विषयमा यथार्थ जानकारी लिन सोलुखुम्बुको प्रमुख जिल्ला अधिकारी, सोलुखुम्बु जिल्लाको सुरक्षा निकाय र। रामेछापको सुरक्षा निकायसँग समन्वय भइरहेको प्रजिअ निरौलाले बताइन् ।
लिखु-२ जलविद्युत आयोजनाले नियम अनुसार १० प्रतिशत पानी छोड्नु पर्ने भए पनि नियम विपरीत नदी नै सुकाएर जलविद्युत आयोजनाले बिद्युत् उत्पादनमा गरेको कारण लास जलाउन विगत देखि नै समस्या हुँदै आएको लिखु नदी किनारका स्थानीयले बताउने गरेका छन् ।
