रामेछाप- रामेछापको सुनापति गाउँपालिकाको नयाँ बनेको प्रशासकीय भवन संचालनमा आउने भएको छ । आर्थिक वर्ष २०७७/०७८ बाट निर्माण कार्य सुरु भएको भवन हाल निर्माण सम्पन्न भएर संचालनमा आउने भएको हो । भवन निर्माणको लागि गएका आर्थिक वर्षहरूमा एकै पटक पर्याप्त बजेट नभएको कारण पटक–पटकको बजेटबाट निर्माण कार्य गर्नु पर्ने भएकाले प्रशासकीय भवन बन्न ढिला भएको गाउँपालिकाले बताएको छ ।
आर्थिक वर्ष २०७७/०७८ देखि २०७९/०८० सम्ममा आइपुग्दा ६ ओटा टेन्डर गरेर काम सम्पन्न गरिएको सुनापति गाउँपालिकाका प्रमुख प्रशासकीय अधिकृत देवेन्द्र सुवेदीले बताए । सुवेदीका अनुसार भवन निर्माणको लागि ४ करोड ५६ लाख ४४ हजार ५ सय १५ रुपैयाँ चार पैसाको लागत अनुमान गरिएको र इबिडिङ मार्फत घटी घटाउमा टेन्डर भएर हाल ३ करोड २८ लाख ४६ हजार ८ सय ८० रुपैयाँ ७ पैसामा निर्माण कार्य सम्पन्न भएको छ । निर्माण सम्पन्न भएको भवनमा हाल १० ओटा कोठा र २ ओटा हल रहेका छन् ।
निर्माण कार्य धेरै अगाडि सुरु गरिएको भए पनि पालिकाको अन्य विकासलाई प्राथमिकतामा राखेर वर्षैपिच्छे थोरै–थोरै बजेट थप्दै निर्माण गर्दा प्रशासकीय भवन बन्न ढिला भएको गाउँपालिका उपाध्यक्ष गिता विष्ट चौलागाईंले बताइन् । २०७४ को स्थानीय तहको निर्वाचन पछि बनेको सानो प्रिफ्याब भवनबाट सेवा दिँदा विगतमा सेवा प्रवाहमा समेत समस्या आउने गरेको बताउँदै उपाध्यक्ष चौलागाईंले अब सेवा प्रवाहमा सहज हुने धारणा व्यक्त गरिन् ।
प्रधानमन्त्री प्रचण्डले उद्घाटन गर्ने
निर्माण कार्य सम्पन्न भएको भवनको प्रधानमन्त्री पुष्प कमल दाहाल ‘प्रचण्ड’ ले गर्ने भएका छन् । सुनापति गाउँपालिकाको वडा नं ३ हिलेदेवीमा निर्माण सम्पन्न भएको भवनको उद्घाटन बिहीबार दिउँसो प्रधानमन्त्री ‘प्रचण्ड’ ले गर्ने कार्यतालिका रहेको गाउँपालिकाले जनाएको छ ।
आफ्नो प्रतिकृया दिनुहोस्