रामेछाप- प्रतिनिधि सभा सदस्य पूर्णबहादुर तामाङ कान्छारामले रामेछाप नगरपालिकालाई आफ्नो कार्यकाल भरी सधैँ पहिलो नम्बरमा राखेर विकासमा साझेदार बन्ने बताएका छन् । शनिवार सम्पन्न रामेछाप नगरपालिका स्तरीय राष्ट्रपति रनिङ शिल्ड प्रतियोगिताको समापन कार्यक्रममा बोल्दै प्रतिनिधि सभा सदस्य तामाङले आफ्नो कार्यकाल भरी रामेछाप नगरपालिकाको विकासमा नगरपालिका र नगरवासीहरूसँग साझेदार गर्दै विकास गर्ने बताएका हुन् । कार्यक्रमका प्रमुख अतिथि समेत रहेका तामाङले आफूलाई संघीय संसद्को जनप्रतिनिधि बनाउनमा रामेछाप नगर बासीको ठुलो भूमिका रहेको बताउँदै रामेछाप नगरपालिकाको वडा नं १ देखि वडा नं ९ सम्मका नागरिकको समस्यामा समाधानमा सधैँ लाग्ने प्रतिबद्धता समेत जनाएका छन् ।
आफू निर्वाचित भएको एक वर्ष पुरा हुँदा जिल्लाको समग्र विकासमा आफूले धेरै काम गरेको दाबी गर्दै प्रतिनिधि सभा सदस्य तामाङले अबको पाँच वर्षमा जिल्लालाई विकासमा धेरै अगाडि बढाउने उद्घोष गरे । उनले जिल्लाको समग्र विकास सँगै खेलकुदको विकासमा पनि आफ्नो तर्फबाट आवश्यक सहयोग गर्न तयार रहेको धारणा राखे ।
नेपाली काँग्रेस जिल्ला कार्य समिति रामेछापको सभापति समेत रहेका तामाङले जिल्लाको विकासमा सबै राजनीतिक दलहरूले आफ्नो दल भन्दा माथि उठेर काम गर्नु पर्नेमा जोड दिएका छन् ।
