रामेछाप- रामेछाप नगरपालिका स्तरीय राष्ट्रपति रनिङ शिल्डको उपाधि गौरीशंकर माविले जितेको छ । शनिवार सम्पन्न छैटौँ रामेछाप नगरपालिका स्तरीय राष्ट्रपति रनिङ शिल्ड प्रतियोगितामा सबै भन्दा बढी स्वर्ण सहित ८५ पदक जित्दै प्रतियोगिताको उपाधि गौरीशंकर माविले जितेको हो ।
प्रतियोगितामा रामेछाप नगरपालिका वडा नं ८ मा रहेको गौरीशंकर माविले ३३ स्वर्ण, २७ रजत र २५ कास्य गरी ८५ पदक आफ्नो पक्षमा पार्न सफल भएको छ । त्यस्तै वडा नं ५ मा रहेको जनता मावि कोलन्जोरले १२ स्वर्ण, ८ रजत र ६ कास्य गरी २६ पदक जित्दै द्वितीय भएको छ भने वडा नं ८ मा रहेको भँगेरी माविले ८ स्वर्ण, ११ रजत र २४ कास्य गरी ४३ पदक जित्दै तृतीय भएको छ ।
नगरका १३ वटा माध्यमिक विद्यालय सहभागी प्रतियोगितामा राष्ट्रिय खेल समेत रहेको पुरुष भलिबल प्रतियोगिताको स्वर्ण पदक भने जनता मावि कोलन्जोरले जितेको छ ।
प्रतियोगितामा विभिन्न खेलमा पदक जित्ने खेलाडीलाई प्रतिनिधि सभा सदस्य पुर्ण बहादुर तामाङ कान्छाराम, जिल्ला समन्वय समिति रामेछापको प्रमुख चिना खड्का कार्की, नगर प्रमुख लवश्री न्यौपाने, नगर उपप्रमुख बाल कुमारी कार्की, प्रमुख प्रशासकीय अधिकृत मित्र प्रसाद घिमिरेले बधाई दिँदै मेडल र प्रमाण पत्र प्रदान गर्दै पौष २१ गते देखि हुने जिल्ला स्तरीय राष्ट्रपति रनिङ शिल्ड प्रतियोगिता उपाधि जित्ने गरी तयारी गर्न आग्रह गरेका छन् ।
प्रतियोगितामा भलिबल, कबड्डी, एथलेटिक्स, छात्र÷छात्रा रिले दौड, तेक्वान्दो, हाई जम्प, लङ जम्प, त्रीपल जम्प, ज्याभलिङ थ्रो, सटपुट लगायतका खेलहरूमा नगरका १३ माध्यमिक विद्यालयका ६ सय ६२ जना खेलाडीले प्रतिस्पर्धा गरेको शिक्षा, युवा तथा खेलकुद शाखा प्रमुख नमराज प्रसाद बडूले बताए । बडूका अनुसार छैटौँ नगरपालिका स्तरीय राष्ट्रपति रनिङ शिल्ड प्रतियोगिताबाट उत्कृष्ट खेल प्रदर्शन गर्दै स्वर्ण पदक जित्ने खेलाडीलाई छनौट गरी पौष २१ गते देखि सुरु हुने जिल्ला स्तरीय राष्ट्रपति रनिङ शिल्ड प्रतियोगितामा भाग लिनको लागि आइतबार देखि नै अभ्यासका खेलहरू खेलाइने छ । जिल्ला स्तरीय प्रतियोगितामा रामेछाप नगरपालिकाबाट मात्रै झण्डै एक सय खेलाडीले सहभागिता जनाउने पनि बडूले बताए ।
