रामेछाप– उमाकुण्ड गाउँपालिकाका अध्यक्ष शेरबहादुर सुनुवारले गुम्देलको प्राकृतिक सुन्दरता र धार्मिक पर्यटकीय क्षेत्रको प्रचार प्रसारको लागि गुम्देलमा राष्ट्रपति रनिङ शिल्ड प्रतियोगिताको आयोजना गरिएको बताएका छन् । आइतबार देखि उमाकुण्ड गाउँपालिकाको वडा नं १ गुम्देलमा सुरु भएको चौथो उमाकुण्ड गाउँपालिका स्तरीय राष्ट्रपति रनिङ शिल्डको उद्घाटन गर्दै अध्यक्ष सुनुवारले गुम्देलको प्राकृतिक सुन्दरता र धार्मिक पर्यटकीय क्षेत्रको प्रचार प्रसारमा सहयोग पुर्याउने मुख्लय उद्देश्य सहित गुम्देलमा प्रतियोगिता आयोजना गरिएको बताएका हुन् ।
उमाकुण्ड गाउँपालिकाको ७ वटै वडाबाट प्रतियोगितामा भाग लिन आएका विद्यार्थीहरूले गुम्देलमा भएका बहुमूल्य बस्तुको जानकारी हुने र उनीहरूले आफ्नो वडामा लगेर गुम्देलमा भएका बस्तुको बारेमा सकारात्मक प्रचार प्रसार हुने हुँदा पनि गुम्देलका लागि राष्ट्रपति रनिङ शिल्ड प्रतियोगिता एउटा प्रचारक बन्ने अध्यक्ष सुनुवारको दाबी छ ।
धार्मिक पर्यटकीय स्थलहरू धेरै रहेको गुम्देलको बारेमा धारणा राख्दै अध्यक्ष सुनुवारले भने– ‘राष्ट्रको सबै भन्दा बढी गुम्बा भएको ठाउँ उमाकुण्डको १ नै हो । हामीलाई धेरै थाहा छैन यहाँ एउटै वडामा १२ वटा त गुम्बा मात्रै छन् । यो कुराको प्रचार प्रसार गर्न जरुरी छ । त्यति मात्रै हैन, उमातिर्थ मन्दिर पनि यही वडा रहेको र अन्य थुप्रै पर्यटकीय ठाउँहरू छन् । यी सबै ठाउँको प्रचार प्रसारमा सहयोग पुर्याउने गरी गुम्देलमा यो प्रतियोगिता आयोजना गरिएको हो ।’
उमाकुण्ड गाउँपालिकाले यो वर्षलाई खेललाई महोत्सवकै रूपमा लिएको बताउँदै उमाकुण्डको खेल क्षेत्रको विकासमा थप टेवा पुग्ने विश्वास व्यक्त गरे । उमाकुण्ड गाउँपालिकालाई समग्रतामा अघि बढाउने गरी गाउँपालिकाले काम गरेको बताउँदै अध्यक्ष सुनुवारले गाउँपालिकाको सर्वाङ्गीण विकासमा सबैले सहयोग र सहकार्य गर्नुपर्ने जोड दिए ।
त्यस्तै कार्यक्रममा बोल्दै गाउँपालिका उपाध्यक्ष सावित्री सुनुवारले गाउँपालिका स्तरीय राष्ट्रपति रनिङ शिल्ड प्रतियोगिता गुम्देलमा हुँदा वडा नं १ ले खेलको क्षत्रमा ठुलो फड्को मार्ने धारणा राखिन । उनले खेलकुदका लागि आवश्यक भौतिक संरचनाहरू निर्माण भएको र उक्त संरचनाले गुम्देललाई दीर्घकालीन फाइदा पुग्ने बताइन् ।
प्रतियोगितामा गाउँपालिकाको ७ वटै वडाका माविहरूले भाग लिइएका छन् । आइतबारबाट सुरु भएको प्रतियोगिता तीन दिन सम्म चल्ने उमाकुण्ड गाउँपालिकाका प्रमुख प्रशासकीय अधिकृत रामचन्द्र लामाले बताए ।
यो वर्षको जिल्ला स्तरीय राष्ट्रपति रनिङ शिल्ड प्रतियोगिता पनि उमाकुण्ड गाउँपालिकामा नै हुने भएको छ ।
