खुर्कोट- सिन्धुलीको खुर्कोटमा रहेको सुनकोशी सामुदायिक अस्पताल खुर्कोटले दाँत उपाचरको लागि अत्याधुनिक मेसिन सहित दन्त सेवा पनि सुरु गरेको छ । समुदायद्वारा स्थापित अस्पतालले सिन्धुली सहित रामेछाप, ओखलढुङ्गा, दोलखा, सोलुखुम्बु, तराइका केही जिल्ला लगायत आसपासका विभिन्न जिल्लाका सेवाग्राहीलाई लक्षित गरी विशेष एक्स-रे मेसिन ओपीजी (मुखभित्रका सबै दाँतको अवस्था देखाउन सक्ने) सहित बिहीबार देखि दन्त सेवा सुरु गरेको हो ।
रोटरी क्लब अफ रुद्रमती काठमाडौँ आरआइडी–३२९२ ले झण्डै ६० लाख बराबरको उपकरणहरू उपलब्ध गराएपछि खुर्कोटमै दाँतको सबै उपचार हुने गरी दन्त सेवा सुरु भएको हो । बिहीबार अस्पताल परिसरमा एक कार्यक्रमको आयोजना गरी रोटरी डिस्ट्रिक्ट ३२९२ नेपाल–भुटानका डिस्ट्रिक्ट गभर्नर राजेन्द्र प्रसाद धोजुले सेवाको उद्घाटन गरेका हुन् ।
उद्घाटन कार्यक्रममा बोल्दै डिस्ट्रिक्ट गभर्नर धोजुले नेपालका ग्रामीण क्षेत्रलाई लक्षित गरी खुर्कोटमा स्थापना गरिएको अत्याधुनिक उपकरण सहितको दन्त सेवाले धेरैलाई सहयोग पु¥याउनेमा आफू विश्वस्तता रहेको धारणा राखे । उनले रोटरी क्लबले उपलब्ध गराएको अत्याधुनिक मेसिन सहितको सेवालाई सही सदुपयोग भएमा आफूहरूले थप सहयोग गर्ने पनि प्रतिबद्धता जनाए ।
दन्त सेवा स्थापना कार्यक्रममा बोल्दै गोलञ्जोर गाउँपालिकाका अध्यक्ष शङ्कर राज बरालले दन्त सेवा स्थापनामा सहयोग पु¥याउने रोटरी क्लबलाई धन्यवाद दिँदै आगामी दिनमा दन्त सेवालाई सञ्चालनमा गाउँपालिकाले सहयोग गर्ने प्रतिबद्धता जनाए ।
रोटरी क्लब अफ रुद्रमती काठमाण्डौको २०२०–२१ का अध्यक्ष सुदिप कोइरालाको पहलमा सिन्धुलीको खुर्कोटमा अत्याधुनिक उपकरण सहितको दन्त सेवा सुरु गर्न सफल भएको सुनकोशी सामुदायिक अस्पतालका अध्यक्ष केशव देवकोटाले बताए ।
दाँत उपचारको लागि काठमाण्डौका महँगा अस्पतालमा जानु पर्ने बाध्यतालाई हटाउनको लागि र गाउँमै गुणस्तरीय दन्त सेवा दिनको लागि रोटरी क्लबको सहयोगमा दन्त सेवा सुरु गरिएको सुनकोशी सामुदायिक अस्पतालका अध्यक्ष केशव देवकोटाले बताए । काठमाण्डौमा पुरै दाँतको एक्स-रे गर्दा झण्डै ४ हजार पैसा तिर्नु पर्ने एक्स-रे खुर्कोटमै एक हजारमा हुने पनि अध्यक्ष देवकोटाले बताए ।
विशेष एक्स-रे ओपीजी मेसिन मार्फत एक पटकमा सबै दाँतको एक्स-रे गर्न सकिने भएको हुँदा दाँतमा भएका सबै समस्या पत्ता लाग्ने र उपचार गर्न सहज हुने सुनकोशी सामुदायिक अस्पतालको दन्त सेवामा कार्यरत डेन्टल सर्जन कृशला कुमारी चौधरीले बताइन् । उनका अनुसार खुर्कोट दन्त सेवाबाट दाँत फुकाल्ने, दाँत सफा गर्ने, किराले खाएको दाँतमा सिमेन्ट भर्ने, नयाँ दाँत राख्ने लगायतका सेवा प्रवाह हुने छन् ।
बिहीबार उद्घाटनको अवसर पारेर अस्पतालले आयोजना गरेको निःशुल्क स्वास्थ्य शिविरमा २९ जनाले दाँत फुकालेका थिए भने ४१ जनाले सुगर र प्रेसरको जाँच गराएका थिए ।
