रामेछाप- नेपाल विद्यार्थी संघ रामेछापले प्रदेश स्तरीय प्रथम नेविसंघ कप खुल्ला पुरुष भलिबल प्रतियोगिताको आयोजना गर्ने भएको छ । विजया दशमी तथा शुभ दीपावलीको अवसर पारेर असोज आइतबार देखि प्रदेश स्तरीय खुल्ला पुरुष भलिबल प्रतियोगिताको आयोजना गर्ने भएको हो । नेपाल विद्यार्थी संघ रामेछापले शनिवार पत्रकार सम्मेलन गरी आइतबार देखि हुने आयोजनाको सबै तयारी पुरा भएको जानकारी गराएको छ ।
विजया दशमीको शुभकामना आदान प्रदान सहित आइतबार खेलको उद्घाटन गरिने र मङ्गलवार समापन गरिने नेपाल विद्यार्थी संघ रामेछापका अध्यक्ष विनोद बुढाथोकीले पत्रकार सम्मेलनमा जानकारी गराएका छन् । १३ जिल्लाबाट खेलाडीहरू सहभागी हुने प्रतियोगिताको उद्घाटन बागमती प्रदेशका आर्थिक मामिला तथा योजना मन्त्री बहादुर सिं लामा र प्रतिनिधि सभाका सदस्य एवं नेपाली काँग्रेस रामेछापका सभापति पूर्णबहादुर तामाङ (कान्छाराम) ले गर्ने अध्यक्ष बुढाथोकीले जानकारी गराए । मङ्गलवार सम्पन्न हुने प्रतियोगिताको समापन सङ्घीय अर्थमन्त्री प्रकाशशरण महतले गर्ने आयोजकले बताएको छ ।
प्रतियोगितामा प्रथम हुने टिमले नगद २ लाख, दोस्रो हुने टिमले १ लाख ५० हजार, तेस्रो हुने टिमले नगद १ लाख र सान्त्वना हुने टिमले ५० हजार नगद पुरस्कार पाउने छन् । प्रथम, द्वितीय र तृतीय हुने टिमले नगद पुरस्कार साथमा शिल्ड, मेडल र प्रमाणपत्र प्राप्त गर्ने अध्यक्ष बुढाथोकीले जानकारी गराए । खेलमा सहभागी हुने खेलाडी तथा टिमलाई बस्ने व्यवस्था पनि आयोजकले नै गर्ने उनले बताए ।
विद्यार्थीको साथीको रूपमा स्थापित नेपाल विद्यार्थी सङ्घले जिल्लाको खेलकुद विकासमा टेवा पु¥याउनुको साथै विद्यार्थीहरूलाई खेलकुदमा प्रेरित गर्ने मुख्य उद्देश्यका साथ खेल आयोजना गर्न लागिएको अध्यक्ष बुढाथोकीले बताए । नेपाल विद्यार्थी संघ रामेछापले यस अघि यति ठुलो धनराशि प्रथम पुरस्कार दुई लाख भएको प्रतियोगिताको आयोजना नगरेको र यो नै पहिलो प्रतियोगिता भएको अध्यक्ष बुढाथोकीले बताए ।
प्रथम पुरस्कार नेपाली काँग्रेसका पूर्व महाधिवेशन प्रतिनिधि गेल्जे शेर्पा, द्वितीय पुरस्कार खाँडादेवी गाउँपालिका वडा नं ६ का वडाध्यक्ष एवं काँग्रेस नेता नारायण कार्की, तृतीय पुरस्कार नेविसंघका केन्द्रीय अध्यक्ष दुजाङ शेर्पा र सान्त्वना पुरस्कार प्रतिनिधि सभा सदस्य एवं नेपाली काँग्रेस रामेछापका सभापति पुर्ण बहादुर तामाङ (कान्छाराम) ले प्रायोजन गर्ने नेविसंघले बताएको छ ।
