रामेछाप– लिखुतामाकोशी गाउँपालिकामा चाडपर्व लक्षित बजार अनुगमन भएको छ । पालिकाको मुख्य मुख्य बजार केन्द्रका बजारमा खाद्यवस्तु, कपडा लगायतका सामाग्रीमा कृत्रिम अभाव देखाएर मूल्य वृद्धि हुन सक्ने र म्याद गुज्रेका सामाग्री विक्री वितरण हुन सक्ने तर्फ ध्यान दिँदै गाउँपालिकाले बजार अनुगमन गरेको हो ।
गाउँपालिकाको नेतृत्वमा जिल्ला प्रशासन कार्यालय र घरेलु तथा साना उद्योग कार्यालयका प्रतिनिधि समेतको उपस्थितिमा मङ्गलवार र बुधवार दुई दिन बजार अनुगमन भएको गाउँपालिकाले बताएको छ । लिखुतामाकोशी गाउँपालिकाको धोबी, तिल्पुङ, खिम्ती, हलेदे, सिरिशे, ढाडे, रातमामा लगायतका स्थानमा रहेका बजारमा अनुगमन गरिएको गाउँपालिका अध्यक्ष केशव महतले बताए ।
दसैँको समयमा व्यापारीहरूले विभिन्न बहानामा आवश्यक बस्तुहरूको कृत्रिम अभाव देखाएर मूल्य वृद्धि गर्न सक्ने र चाडपर्वको मौका छोपेर म्याद गुज्रेका सामाग्री समेत विक्री गर्न सक्ने भएकाले त्यसको नियन्त्रणको लागि बजार अनुगमन गरिएको गाउँपालिका अध्यक्ष महतले बताए । महतका अनुसार अनुगमनको क्रममा भेटिएका म्याद गुज्रेका सामाग्रीलाई नष्ट गरिएको र यस अघि पनि पटक पटक म्याद गुज्रेका सामाग्री भेटिएका पसललाई जरिवाना गरिएको छ ।
बजार अनुगमनका क्रममा सबै पसलमा उपभोक्ताले प्रस्टसँग देख्ने ठाउँमा मूल्य सूची राख्न, म्याद गुज्रेका सामाग्रीलाई नष्ट गर्न वा फिर्ता पठाउन र दर्ता नगरी संचालन गरिएका पसललाई सम्बन्धित निकायमा गएर दर्ता गर्न अनुरोध गरिएको अध्यक्ष महतले बताए ।
अनुगमनका क्रममा देखिएका गल्तीहरूलाई पुनः नदोहोर्याउन र आफ्नो व्यवसाय संचालन गर्दा पूरा गन गर्नु सर्तहरू पूर्ण रूपमा पालना गरेर मात्रै पसल तथा व्यवसाय संचालन गर्न सुझाव समेत दिइएको अध्यक्ष महतले बताए ।
हाम्रो प्रहार डटकमसँग कुरा गर्दै अध्यक्ष महतले दसैँको मौका छोपेर कुनै पनि व्यापारी एवं व्यवसायीले अस्वाभाविक मूल्यमा सामाग्री बेचेको पाइएमा गाउँपालिका वा सम्बन्धित निकायहरूलाई खबर गर्न आम उपभोक्तालाई आग्रह गरेका छन् । दसैँको बेला अस्वाभाविक मूल्य वृद्धि गरेर कसैले सामाग्री विक्री वितरण गरेको पाइएमा कानुन अनुसार कारबाही गरिने पनि अध्यक्ष महतले बताए ।
गाउँपालिका अध्यक्ष महतको नेतृत्वमा रहेको बजार अनुगमन टोलीमा गाउँपालिका उपाध्यक्ष दिपा पाख्रिन, जिल्ला प्रशासन कार्यालय रामेछापका प्रतिनिधि लक्ष्मण भुजेल, घरेलु तथा साना उद्योग कार्यालय रामेछापका प्रतिनिधि लगायतको सहभागिता रहेका थियो ।
दुई दिनको अनुगमनमा लिखुतामाकोशी गाउँपालिका भित्र सञ्चालनमा रहेका झन्डै ३ सय पसल तथा व्यवसायको अनुगमन गरिएको गाउँपालिकाले बताएको छ ।
