रामेछाप– जिल्ला ट्राफिक प्रहरी कार्यालय रामेछापले ढुवानीका साधन र सवारीका साधन चलाउने चालकको स्वास्थ्य परीक्षण गर्ने अभियान चलाएको छ । सडक दुर्घटनालाई कम गर्ने उद्देश्यले मन्थली बजारको चोक–चोकमा चालकको स्वास्थ्य परीक्षण अभियान चलाएको हो । शनिवार मन्थलीको भैसेसुर चोकमा ट्राफिक प्रहरीले स्वास्थ्य कर्मी सहितको टोलीले ५० जना चालकहरूको स्वास्थ्य परीक्षण गरेको छ । स्वास्थ्य परीक्षणमा परीक्षण गरिएका मध्ये ३ जनाको ‘प्रेसर हाइ’ भेटिएको र अन्य बाँकीको स्वास्थ्य अवस्था सामान्य रहेको जिल्ला ट्राफिक प्रहरी कार्यालय रामेछापका प्रमुख प्रहरी सहायक निरीक्षक दीपक चौलागाईले बताए । परिक्षणीको क्रममा प्रेसर बढी भएका चालकहरूलाई सवारी चलाउँदा सावधानी अपनाउन अनुरोध गरिएको चौलागाईले बताए ।
ढुवानी तथा सवारीका साधन चलाउने चालकहरूमा हुने स्वास्थ्य समस्याका कारण पनि विभिन्न दुर्घटना हुने भएको हुँदा दुर्घटनालाई कम गर्नको लागि स्वास्थ्य परीक्षणको अभियान चलाइएको ट्राफिक प्रहरी प्रमुख दीपक चौलागाईले बताए । चालकहरूलाई आफ्नो स्वास्थ्यमा कुनै समस्या आएमा आफूले चलाउँदै आएका साधन नचलाउन अनुरोध सहित चालकहरूलाई अनुरोध गर्ने गरेको पनि चौलगाईले बताए । स्वास्थ्य परीक्षणको अभियानलाई निरन्तरता दिने ट्राफिक प्रहरीको तयारी रहेको छ ।
रामेछापमा हुने सडक दुर्घटनालाई कम गर्न ट्राफिक प्रहरी कार्यालय रामेछापले विभिन्न अभियान चलाउँदै आएको छ ।
