रामेछाप– गोकुलगंगा गाउँपालिकाले आगामी आर्थिक वर्ष २०८०/०८१ का लागि ल्याएको नीति तथा कार्यक्रममा कृषिलाई पहिलो प्राथमिकता दिँदै कृषिजन्य बस्तुको प्याकेजिङ र ब्राण्डिङ गर्ने देखि एकीकृत घरधुरी सर्वेक्षण सहित गरिबी स्तरीकरण सहितको डिजिटल गाउँ प्रोफाइल बनाउने सम्मका योजनालाई समेटेको छ । आइतबार सम्पन्न १३ औँ गाउँ सभाले कृषिलाई पहिलो प्राथमिकतामा राखेर किवी फर्म व्यवस्थापन, व्यावसायिक आलु खेती प्रवर्द्धन, ओखर, स्याउ, बेसार खेतीको नर्सरी व्यवस्थापन गर्दै खेती गरी कृषि जन्य बस्तुको प्याकेजिङ र ब्राण्डिङ गरी आर्थिक वृद्धिलाई नीति तथा कार्यक्रममा बढी जोड दिइएको गाउँपालिका अध्यक्ष काजी बहादुर खड्का (दिनेश) ले बताए ।
त्यस्तै नीति तथा कार्यक्रममा व्यावसायिक पशुपालन, पशुपक्षी तथा मत्स्य बिमा कार्यक्रम, उद्यमीलाई सीप विकास तालिम लगायतका कार्यक्रम पनि नीति तथा कार्यक्रममा समेटिएका छन् । गर्भवती महिलाको लागि निःशुल्क एम्बुलेन्स सेवा संचलान, लक्षित वर्गको कार्यक्रम, कृषि जन्य बस्तुको भण्डारणको लागि चिस्यान केन्द्र स्थापना, लगायतका कार्यक्रम पनि आगामी नीति तथा कार्यक्रममा समेटिएका छन् ।
वडा कार्यालय र स्वास्थ्य तथा शिक्षण संस्थाहरूको नियमन, नियन्त्रण र व्यवस्थापनका लागि ई हाजिरी लागु गर्ने पनि नीति तथा कार्यक्रममा उल्लेख छ ।
त्यस्तै आगामी आर्थिक वर्षका लागि गाउँपालिका भित्र रहेका सडक तथा अन्य पूर्वाधारका ठुला आयोजनालाई पनि सँगै अगाडि बढाउने नीति तथा कार्यक्रममा उल्लेख गरिएको छ ।
गोकुलगंगाको कुल बजेट ७४ करोड ४२ लाख बढी
गोकुलगंगा गाउँपालिकाले आगामी आर्थिक वर्षको लागि ७४ करोड ४२ लाख ९३ हजार २ सय रुपैयाँ बराबरको कुल बजेट ल्याएको छ । गाउँपालिका उपाध्यक्ष उषादेवी कार्कीले प्रस्तुत गरेको बजेटमा चालु तर्फ ३८ करोड ९८ लाख ७५ हजार ७ सय र पुँजीगत तर्फ ३५ करोड ४४ लाख १७ हजार ५ सय रुपैयाँ गरी ७४ करोड ४२ लाख ९३ हजार २ सय रुपैयाँ बराबरको कुल बजेट उल्लेख छ ।
कार्यक्रममा गोकुलगंगा गाउँपालिकाका प्रमुख प्रशासकीय अधिकृत होम बहादुर थापा, सबै वडाका वडाध्यक्षहरू, कार्यपालिका सदस्य, वडा सदस्य तथा स्थानीयहरूको पनि सहभागिता रहेको थियो ।
गाउँपालिका अध्यक्षले प्रस्तुत गरेको नीति तथा कार्यक्रम र उपाध्यक्षले प्रस्तुत गरेको प्रस्तावित कार्यक्रम तथा बजेट सर्वसम्मत रूपमा पास भएको छ ।
