रामेछाप– मन्थली नगरपालिकाले आगामी आर्थिक वर्ष २०८०/०८१ का लागि नगरका नागरिकहरुको आर्थिक प्रणाली सुधार गर्ने कार्यक्रमलाई पहिलो प्राथमिकतामा राखेको छ । आइतबार मन्थली नगरपालिकाको १३ औँ नगरसभा नगर प्रमुख लव श्रेष्ठले आगामी आर्थिक वर्षका लागि ल्याईको नीति तथा कार्यक्रम प्रस्तुत गर्दै नगरको आर्थिक प्रणाली सुधारलाई पहिलो प्राथमिकतामा राखेर नीति तथा कार्यक्रम ल्याइएका हुन् । नगर प्रमुख श्रेष्ठले आर्थिक अवस्था सुधारको लागि व्यवसायिक कृषि, कृषि जन्य उद्योग, पशुपालन व्यवसाय, दुग्ध तथा तरकारी फलफूलमा नगरलाई आत्मानिर्भर बनाई निर्यात समेत गर्न सक्ने गरी नीति तथा कार्यक्रम तयार गरिएको बताए ।
नगरका पर्यटकीय क्षेत्रहरुलाई आवश्यक पूर्वाधार विकास गरी प्रचार प्रसारमा जोड दिने नीति तथा कार्यक्रम उल्लेख छ । नीति तथा कार्यक्रममा स्वास्थ्य क्षेत्र तर्फ नगरमा रहेको १५ शैयाको मन्थली अस्पताललाई ५० शैयामा स्तर बृद्धि गरिने योजना उल्लेख छ । त्यस्तै स्वस्थ नगर बनाउनको लागि एक घर एक स्वास्थ्य बीमा कार्यक्रम, नागरिकसँग स्वास्थ्यकर्मी जस्ता कार्यक्रमहरु संचालन गरिने पनि नीति तथा कार्यक्रममा उल्लेख छ ।
आगामी आर्थिक वर्षका लागि १ अर्व ४ करोढ बढीको बजेट
आगामी आर्थिक वर्ष २०८०/०८१ का लागि मन्थली नरपालिकाले १ अर्व ४ करोढ बढीको बजेट ल्याएको छ । १३ औँ नगरसभाले कुल १ अर्व ४ करोड ५४ लाख ९२ हजार ८ सय ३७ रुपैयाँ बराबरको बजेट ल्याएको हो ।
नगर उपप्रमुख इश्वरी बस्नेतले प्रस्तुत गरेको बजेटमा चालु तर्फ ४५ करोड ९३ लाख ९२ हजार ७ सय ८७ रुपैयाँ र पुँजीगत तर्फ ५८ करोड ६१ लाख ५० हजार रुपैयाँ उल्लेख छ । नगर उपप्रमुख बस्नेतले आगामी आर्थिक वर्षका लागि ल्याइएको बजेटमा पूर्वाधार विकास, स्वास्थ्य, शिक्षा, कृषि तथा पशुपालन, विपद् व्यवस्थापन, रोजगारी सिर्जना र सुशासनलाई बिषयलाई मुख्य प्राथमिकतामा राखेर बजेट ल्याइएको बताइन् ।
नगर प्रमुख लव श्रेष्ठले प्रस्तुत गरेको नीति तथा कार्यक्रम र उपप्रमुख इश्वरी बस्नेतले प्रस्तुत गरेको आगामी वर्षको बजेट नगरसभाबाट पुर्ण रुपमा पास भएको छ ।
कार्यक्रममा मन्थली नगरपालिकाका प्रमुख प्रशासकीय अधिकृत हरिप्रसाद चापागाईँ, १४ वटै वडाका वडा अध्यक्षहरू, कार्यपालिका सदस्य, वडा सदस्य, पालिकाका स्थानीय, पत्रकारहरूको सहभागिता रहेको थियो ।
