रामेछाप– नयाँ गोरख गण रामेछापले ‘एक इकाई एक विद्यालय सहयोग’ कार्यक्रम मार्फत रामेछाप नगरपालिका वडा नं ७ सुकाजोर स्थित मुगानमा रहेको सिद्धेश्वर आधारभुत विद्यालयमा अध्ययनरत विद्यार्थीलाई शैक्षिक सामाग्री वितरण, विद्यार्थीहरूको स्वास्थ्य परीक्षण तथा विद्यालय परिसरमा वृक्षारोपण गरेको छ । नेपाली सेनाको मध्ये पूर्वी पृतना हेड क्वाटरका पृतनापति उपरथी प्रेमध्वज अधिकारीको परिकल्पनामा तयार भएको ‘एक इकाई एक विद्यालय सहयोग’ कार्यक्रमबाट जीर्ण अवस्थामा रहेका तथा श्रोत साधनबाट विपन्न अवस्थामा रहेका सरकारी/सामुदायिक विद्यालयलाई सहयोग पुर्याउने उद्देश्यले विद्यार्थीलाई शैक्षिक सामाग्री वितरण, विद्यार्थीहरूको स्वास्थ्य परीक्षण तथा विद्यालय परिसरमा वृक्षारोपण गरिएको हो ।
नयाँ गोरख गण रामेछापको क्षेत्र भित्र पर्ने विपन्न वर्गका सन्तति अध्ययन गर्ने, भौतिक रूपले जीर्ण अवस्थामा रहेको र श्रोत साधनको कमी रहेको रामेछाप नगरपालिका वडा नं ७ स्थित मुगानमा सिद्धेश्वर आधारभुत विद्यालयलाई छनौट गरी शैक्षिक सत्र २०८० साल वैशाख महिना देखि २०८० चैत्र महिनासम्म विभिन्न कार्यक्रमहरूको आयोजना गरी शैक्षिक गुणस्तर अभिवृद्धि गर्ने योजना अनुरूप उक्त विद्यालयमा कार्यक्रम सुरु गरिएको नयाँ गोरख गण रामेछापका गणपति दीपक टण्डन क्षेत्रीले बताए ।
गणपति क्षेत्रीका अनुसार गएको वैशाखमा विद्यालय खेलकुदका सामाग्री वितरण, ज्येष्ठमा विद्यालय परिसरमा वृक्षारोपण तथा विद्यालयको मुलगेट लगायत कक्षाकोठाको भित्तामा विद्यार्थीरुको पठनपाठनमा सहजताको लागि पाठ्य सामाग्री तथा ज्ञानवर्धक विषय समेटिने कार्टुनी चित्र भित्ते लेखन र असारमा शैक्षिक सामाग्री वितरण, विद्यालयको परिसरमा वृक्षारोपण, २७ विद्यार्थीको स्वास्थ्य परीक्षण गरी औषधि वितरण गरिएको छ ।
नयाँ गोरख गण रामेछापले यस अघि पनि गण आसपासमा रहेका सामुदायिक विद्यालय परिसर तथा कक्षा कोठाको भित्तामा विद्यार्थीरुको पठनपाठनमा सहजताको लागि पाठ्य सामाग्री तथा ज्ञानवर्धक विषय समेटिने कार्टुनी चित्र तथा भित्ते लेखन कार्य गर्दै आएको छ ।
आफ्नो प्रतिकृया दिनुहोस्