रामेछाप- छिमेक लघुवित्त वित्तीय संस्था काठमाण्डौ क्षेत्र अन्तरगत रामेछाप शाखाले आफ्नो संस्थामा आवद्ध रहेका सदस्यहरुलाई व्यवसायिक बाख्रा पालन तालिम दिएको छ । संस्थामा आवद्ध रहेका सदस्यहरूलाई व्यावसायिक रुपमा बाख्रा पालनमा सहयोग पुर्याउने उदेश्यले बिभिन्न समूहबाट प्रतिनिधित्व हुनेगरी ४० जना किसान सदस्यहरुलाई तालिम दिइएको हो ।
तालिमबाट किसानहरुलाई व्यावसायिक रुपमा बाख्रा पालन र सदस्यको आयस्तर तथा क्षमता वृद्धि गर्न मद्धत पुग्ने विश्वास लिएको छ । विभिन्न व्यवसाय संचालनको लागि बिना धितो ऋण दिएको संस्थाले तालिम दिएपछि व्यावसाय संचालनमा समेत सहयोग पुगेको तालिमका सहभागीले बताएका छन् । सहभागीहरुले आगामी दिनमा निश्चित उद्देश्य लियर व्यावसायिक रुपमा बाख्रा पालन गर्ने समेत प्रतिबद्धता जनाएका छन् ।
१६ गते देखि १८ गते सम्म संचालन भएको तालिममा बाख्रा पालन गर्दा आधारभुत रुपमा गर्नु पर्ने तयारी, भावी योजना, विभिन्न रुपमा आउने समस्याको समधान र पशु बिमा सम्बन्धीको बारेमा जानकारी गराइएको थियो ।
तालिम समापन पश्चात सदस्यलाई ब्यबसाय सुरु गर्न हौसला प्रदान गर्न विभिन्न किसिमको उन्नत जातको घाँसको बिरुवा पनि बितरण गरिएको छ ।
तीन दिन सम्म चलेको तालिममा छिमेक लघुवित्त वित्तीय संस्था लिमिडेट काठमाण्डौ क्षेत्र अन्तरगत रामेछाप शाखाका शाखा प्रवन्धक तथा कार्यक्रम संयोजक लक्ष्मण शाह, प्रशिक्षक निशान श्रेष्ठ, स्थानीय निकायमा कार्यरत पशु प्राविधिक र निर्जिबन बिमा कम्पनी सिद्धार्थ प्रिमियर इन्स्योरेन्स मन्थलीका शाखा प्रमुख नबराज खड्का लगायतले सहजीकरण गरेका थिए ।
छिमेक लघुवित्त वित्तीय संस्थाले सदस्यलाई बिना धितो कर्जाको साथसाथै विभिन्न आयमुलक, शिपमुलक आधारभूत र ब्यबसायिक तालिमहरु सन्चालन गर्दै आएको छ ।
