रामेछाप– मन्थली नगरपालिका वडा नं ७ भटौलीको कौछिनीमा विहिबार भएको बोलेरो दुर्घटनामा मृत्यु हुनेको संख्या ५ पुगेको छ । सदरमुकाम मन्थलीबाट कौछिनी तर्फ जाँदै गरेको बा ११ च ५५३ नम्बरको बोलेरो जिप सडकबाट करिव एक सय मिटल तल खस्दा घटना स्थलमै ४ जनाको र एक जनाको रामेछाप सामुदायिक अस्पतालमा उपचारको क्रममा मृत्यु भएको छ ।
मृतक पाँचै जनाको सनाखत भएको प्रहरी प्रवक्त राजुप्रसाद ढकालले बताए । ढकालका अनुसार मृत्यु हुनेमा मन्थली नगरपालिका– ७ कौछिनी ८२ वर्षकी नन्दमाया भण्डारी, ६८ वर्षकी जेशुङ तामाङ, ४० वर्षकी ज्यान रानी तामाङ, ५० वर्षको दल बहादुर आलोमगर र सुनापती गाउँपालिका– १ गुन्सीकी ८ वर्षकी लाक्पा घिसिङ रहेका छन् । मृतक मध्ये चार जना बोलेरोमा सवार यात्रु रहेको र १ जना चालक रहेको प्रहरी प्रवक्ताले बताए ।
त्यस्तै दुर्घटना परी घाइते हुनेहरुमा मन्थली नगरपालिका– ६ की ३५ वर्षकी बिमला गोले, निजकै दुई छोरी ११ बर्षकी ओजेस्वी लामा र ५ वर्षकी सम्भावी लामा, मन्थली नगरपालिका– ७ कौछिनीका ७० वर्षका भक्त बहादुर लामा, ४४ वर्षका बेद बहादुर बुढाथोकी, ६० वर्षकी मनमाँया तामाङ, ४७ वर्षकी दुर्गामाँया खड्का, २५ वर्षका कमल गोले, ३४ वर्षका हरी बहादुर थोकर, गोकुलगंगा गाउँपालिका– ५ रस्नालुकी २७ वर्षकी निस्मा मग्राती र उनकी छोरी ३ वर्षकी निनिमा मग्राती रहेका छन् ।
घाइते ११ जना मध्ये ११ वर्षकी ओजेस्वी लामाको अवस्था गम्भिर रहेको प्रहरीले बताएको छ । गम्भिर घाइते भएकी ११ वर्षकी ओजेस्वी लामा सहित ३ जनालाई थप उपचारको लागि एम्बुलेन्स मार्फत काठमाण्डौ पाठाइएको छ भने अन्य घाइतेलाई मन्थली अस्पताल र रामेछाप सामुदायिक अस्पतालमा उपचार भइरहेको छ ।
घुम्तीमा मोड्ने क्रममा ब्रेक नलागेपछि बलेरो कौछिनीको मगरगाँउ नजिकको सडकबाट करिब १०० मिटर तल खसेको प्रहरीको प्रारम्भिक अनुमान रहेको छ । डबल क्याप बोलेरोमा १६ जना सवार रहेका थिए ।
