रामेछाप– सदरमुकाम मन्थलीको बीच बजारमा व्यक्तिगत प्रयोजनको लागि जग्गा खार्दा मन्थलीको मुख्य बजार नै धुलाम्मे भएको छ । विगत तीन दिन देखि अव्यवस्थित तरिकाले जग्गा खार्दा मानव स्वास्थ्यमाथि नै प्रतिकुल असर पर्ने गरी मन्थलीको मुख्य बजार धुलाम्मे भएको हो ।
मन्थलीको देवकोटा चोकबाट करिव २ सय मिटर (उत्तर तर्फ) अगाडि मुख्य सडकसँग जोडिएको जग्गा अव्यवस्थित तरिकाले खार्दा दिउँसको समयमा मन्थली बजार धुलाम्मे हुने गरेको स्थानीय बजारबासीले गुनासो गरेका छन् । तीन दिन देखि रातको समयमा जग्गा खार्ने काम भएको र उक्त ठाउँबाट निस्केको माटो सडक भरी छरिएको कारण दिउँसो घाम लागेको बेला अत्याधिक धुलो उड्ने गरेको स्थानीय मिन प्रसाद घिमिरेले बताए ।
स्थानीय मिन प्रसाद घिमिरेले भने– ‘तीन वर्ष अघि देखि खन्न थालेको जग्गा अहिले सम्म पनि बर्षै पिच्छे खन्ने काम भएको छ । तर, अहिले सम्म खन्ने काम भने सम्पन्न भएको छैन् । हामीले बर्षै पिच्छे यस्तै समस्या भोग्नु परेको छ । यो पटकको काम हेर्दा यो वर्ष पनि यो खन्ने काम सकिदैँन् । यस्तै तरिकाले यो काम हुने हो भने मन्थली बजार महिनौ सम्म धुलाम्मे हुने देखिन्छ ।’
पानी परेको बेला माटो बाहिर फाल्न लैजदा ट्रकको चक्कामा अड्किएको माटो सडकमा खस्ने हुँदा त्यही माटो दिउँसो घाम लाग्दा धुलोमा परिणात हुँदा बजार धुलाम्मे हुने गरेको उक्त जग्गा नजिकै घर भएका स्थानीले बताए । उनले भने– ‘राती केही घण्टा डोजर र माटो फाल्ने साधानहरु चल्छन् । तर, काम कहिल्यै सकिदैँन् । ट्रकमा माटो फाल्न लैजदा पनि खुल्ला रुपमा लगिन्छ । त्यो माटो पनि सडकमा खस्छ । तर, सफा गर्ने र सडक धुने काम उहाँहरुबाट हुँदैन् । त्यसैले गर्दा अहिले यो सडकबाट सवारीका साधान र ढुवानीका साधान चलाउँदा अत्याधिक धुलो उड्ने गर्छ ।’
व्यक्तिगत जग्गा खार्दा अहिले त्यही जग्गाको सिमाना हुँदै बजारमा विस्तार गरिएको खाने पानीको पाइप समेत काटिएको कारण धेरैको घरमा पानी आउन बन्द भएको स्थानीयले बताएका छन् ।
जग्गाको नजिकै सार्वजनिक संस्था राष्ट्रिय वाणिज्य बैंक र एनएमबी बैंक रहेका छन् । ति बैंकमा सेवा लिन आउने मानिसलाई समेत धुलोले समस्या हुने गरेको सेवा लिन आउने सेवाग्राहीले गुनासो गरेका छन् ।
आकाशे पानी परेकै समयमा जग्गा खन्ने कामले गर्दा जग्गा भएको स्थान देखि कटहरबोट, देवकोटा चोक र जिल्ला प्रशानस जाने सडक धुलाम्मे हुने गरेका छन् । यसरी तीन दिन देखि मुख्य बजार नै धुलाम्मे हुँदा पनि मन्थली नगरपालिका र जिल्ला प्रशासन पनि मौन बसेको स्थानीयले आरोप लगाएका छन् ।
उक्त जग्गा स्थानीय द्वारिका कार्कीको रहेको र त्यहाँ घर बनाउनको लागि जग्गा खन्ने काम भएको बताइएको छ ।
