रामेछाप- नेपाली कांग्रेस रामेछापले केही दिन अघिदेखि सुरु भएको आगलागी नियन्त्रणमा सक्रिय सहभागी हुन काँग्रेस मातहत रहेका कार्यसमिति, भातृ संस्था र शुभेच्छुक संस्थालाई अनुरोध गरेको छ । नेपाली कांग्रेस रामेछापका कार्यबाहक सभापति लेखबहादुर कार्कीले प्रेस बिज्ञप्ती जारी गर्दै आगलागी नियन्त्रणमा सक्रिय सहभागी हुन अनुरोध गरेका हुन् ।
बिज्ञप्तिमा भनिएको छ- ‘विगत केही दिन देखि जिल्लाको मन्थली नगरपालिका र रामेछाप नगरपालिका लगायत जिल्लाका धेरै स्थानहरुमा भिषण आगलागी भई जंगल विनास भैरहेको साथै केहि ठाउँमा व्यक्तिका घर गोठहरु समेत जलेर सम्पत्ती क्षती भएको प्रति नेपाली कांग्रेस रामेछापको गम्भिर ध्यानाकर्षण भएको छ । आगो नियन्त्रणमा सरकारी प्रयासहरु भैरहेका भएपनि ति प्रयासहरुले सफलता प्राप्त गर्न सकिरहेको देखिदैन । वन जंगलहरु हामी सबै समुदायहरुको सम्पती भएका कारण यसको संरक्षण गर्नु पनि हाम्रो साझा दायित्व हो । वनमा आगो लगाउने कार्य कानूनी र पर्यावरणीय रुपमा अपराध भएकोले आगो लगाउने व्यक्तिको पहिचान गरी कानुनी कठघरामा उभ्याउने कार्यमा सहयोग पु–याउनु हुन र आगलागी नियन्त्रणमा होसियारका साथ सक्रिय सहभागी भैदिनु हुन नेपाली काग्रेस रामेछाप अन्तरगतका सबै तहगत कार्यसमितिहरु, भातृ एवं शुभेच्छुक संस्थाहरुलाई हार्दिक अनुरोध गर्दछु ।’
‘साथै हाल भैरहेको आगलागि नियन्त्रण र बाँकी ठाउँहरुमा आगलागीबाट बचाउन स्थानीय तहहरुसंग समन्वय गरि तत्काल कार्ययोजना बनाई कार्यन्वयन गर्ने र गराउने कार्यमा सक्रिय सहभागिको लागि समेत अनुरोध गर्दछु ।’ विज्ञप्तिमा भनिएको छ ।
