रामेछाप- मन्थली सहिद स्मृति बहुमुखी क्याम्पसको स्वतन्त्र विद्यार्थी युनियनको निर्वाचन प्रक्रियाको मतदान कार्य सम्पन्न भएको छ । आइतबार बिहान ८ बजेबाट सुरु भएको मतदान प्रक्रिया अपरान्ह ४ बजे सम्पन्न भएको हो । अपरान्ह ४ बजे सम्पन्न भएको मतदानमा ५ सय १४ जनाले मतदान गरेका छन् ।
७ सय ३ मतदाता रहेको मन्थली सहिद स्मृति बहुमुखी क्याम्पसमा ७३ दशमलव ११ प्रतिशत मत खसेको छ । मतदान प्रक्रिया सम्पन्न भएपछि प्रतिस्पर्धी विद्यार्थीहरुको प्रतिनिधि समेतलाई राखेर निर्वाचन मण्डलले मतगणनाको समय तोक्ने गरी बैठक भइरहेको निर्वाचन अधिकृत रिता दाहाल सुवेदीले बताइन् ।
मतगणना आज राती नै हुने र मतपरिणाम पनि आज राती नै आउने आकलन गरिएको निर्वाचन अधिकृत सुवेदीले बताइन् ।
स्ववियु सभापतिमा नेविसंघ, अखिल क्रान्तिकारी र नेकपा एस निकट अनेरास्ववियुको तर्फबाट अविनाश कार्की र अनेरास्ववियुको तर्फबाट पुस्कर भट्टराई प्रतिस्पर्धामा रहेका छन् ।
दुई समूहले आ–आफ्नो नेतृत्वमा छुट्टाछुट्टै प्यानल बनाएर निर्वाचनमा होमिएका छन् ।
त्रिभुवन विश्वविद्यालय अन्तर्गतका आंगिक र सम्बन्धन क्याम्पसमा आइतबार एकै समयमा स्ववियु निर्वाचन भएको हो ।
