रामेछाप- निशान बचत तथा ऋण सहकारी संस्था लिमिटेड रामेछापले आफ्नो स्थापना दिवस मनाएको छ । सहकारीले १०औं वर्ष पुरा गरेको अबसरमा सोमबार जिल्ला अस्पताल रामेछापमा उपचाररत विरामीहरुको सिघ्र स्वास्थ्यलाभको कामना सहित विरामीलाई फलफूल वितरण गरेर स्थापना दिवस मनाएको हो ।
जिल्ला अस्पतालमै पुगेर रामेछाप नगरपालिकाका नगर प्रमुख लवश्री न्यौपाने तथा सहकारीका प्रतिनिधिले विरामीको सिघ्र स्वास्थ्य लाभको कामना गरेका छन् । नगर प्रमुख न्यौपानेले सहकारी स्थपना भएको १० वर्षमा बचतकर्ताको राम्रो मन जित्न सफल भएको बताउँदै आगामी दिनमा पनि यो अवस्थालाई कायम राख्न सहकारीका संचालकलाई अनुरोध गरेका छन् ।
स्थापना दिवसकै अवसर पारेर सोमबारदेखि एक हप्तासम्म सप्ताहव्यापी रुपमा निशान बचतमा निशुल्क खाता खोल्न सकिने अभियान सञ्चालन गरेको निशान बचत तथा ऋण सहकारी संस्थाका व्यवस्थापक लक्ष्मण श्रेष्ठले जानकारी दिए । साथै गत वर्षदेखि निशान स्वास्थ्य विमा अनुदान कार्यविधि लागु गरि १७ जना सदस्यहरुले यो सेवा लिइरहेका छन् भने यो वर्ष ३० जना थप गरि यो कार्यक्रमलाई निरन्तरता दिने पनि श्रेष्ठले बताए ।
