रामेछाप- मन्थली नगरपालिकाले संचालन गर्दै आएको ‘मन्थली नगर कप’ आइतबार देखि सुरु हुने भएको छ । यस अघि ‘मेयर कप’ का रुपमा संचालन हुँदै आएको प्रतियोगिताको नाम नै परिवर्तन गरेर नगर कप रुपमा आयोजना गर्न लागिएको प्रथम नगर कप आइतबार देखि सुरु हुने भएको हो । मन्थली नगर खेलकुद नगर खेलकुद समितिको निर्णयले मेयर कपलाई नगर कपमा परिणत गर्दै आयोजनालाई निरन्तरता दिन लागिएको नगर प्रमुख लव श्रेष्ठले बताए ।
मेयर एउटा पद हो,‘नगर प्रमुख श्रेष्ठले भने,‘ मेयर कप उच्चारण गर्दा पनि एउटा व्यक्तिको भक्ति गरेजस्तो हुने रहेछ । यसलाई परिवर्तन गरेर समग्र नगरको पहिचान हुने गरी ‘मन्थली नगर कप’ नामकरण गरिएको हो । यसले नगरको छुट्टै पहिचान बनाउन मद्दत पुर्याउँछ ।’
सिङ्गो नगरको प्रतिष्ठा संग जोडिएको ‘नगर कप’ भन्ने शब्द नगरमैत्री र लोकतान्त्रिक हुने हुँदा नगर खेलकुद विकास समितिको बैठकले ‘मेयर कप’ को ठाउँमा ‘नगर कप’ राम्रो भन्ने निष्कर्ष निकाल्दै ‘नगर कप’ बनाएको नगरपालिकाका सूचना अधिकारी हेमन्त बुढाथोकीले बताए ।
मेयर कपबाट नगर कपमा परिणात भएको प्रतियोगितामा यो वर्ष खुल्ला पुरुष भलिबल प्रतियोगिता आयोजना गर्ने निर्णय भएको नगर खेलकुद विकास समितिले बताएको छ ।
नगर क्षेत्र भित्र रहेका खेलाडीहरुको पहिचान सँगै नगरको खेलकुद विकासलाई थप बलियो बनाउने उद्देश्यले संचालन गरिदैँ आएको प्रतियोगितामा नगरका १४ वटा वडाबाट एक/एक टिम सहभागी हुने नगरपालिकाले जनाएको छ ।
प्रतियोगितामा प्रथम, द्वितिय र तृतिय हुने टिमलाई क्रमशः १ लाख, ७५ हजार र ५० हजार नगदको साथमा शिल्ड, मेडल र प्रमाण पत्र दिइने नगर खेलकुद विकास समितिले बताएको छ । त्यस्तै सान्त्वना हुने टिमलाई ३० हजार नगदको साथमा शिल्ड र प्रमाणपत्रको व्यवस्था रहेको पनि आयोजकले बताएको ।
आइतबारबाट जिल्ला समन्वय समिति पछाडिको खेलमैदानमा हुने प्रथम नगर कप रनिङ शिल्ड पुरुष भलिबलको सम्पूर्ण तयारी पूरा भएको आयोजकले बताएको छ । आइतबार विहानबाट प्रतियोगिता संचालन हुने समितिले बताएको छ ।
आफ्नो प्रतिकृया दिनुहोस्