रामेछाप- जिल्ला प्रशासन कार्यालय रामेछापले नागरिकको सेवा प्रवाहलाई प्रभावकारी बनाउन शुक्रबारदेखि विभिन्न सेवा प्रवाहमा ‘सेवा प्रवाह समय कार्ड’ लागू गरेको छ । प्रशासनको सेवा प्रवाहलाई चुस्त बनाउने र नागरिकको सेवा प्रवाह प्रभावकारी हुने विश्वास सहित प्रक्रिया पुगेका सेवाग्राहीको कामलाई निश्चित समय भित्र सक्ने गरि ‘सेवा प्रवाह समय कार्ड’ सुरु गरिएको प्रमुख जिल्ला अधिकारी शोभाखर रेग्मीले बताए ।
हाल कार्यालयबाट उपलब्ध हुने विभिन्न सेवा मध्ये बढी भिडभाड हुने नागरिकता, राहदानी र राष्ट्रिय परिचय पत्रमा ‘सेवा प्रवाह समय कार्ड’ लागू गरिएको प्रजिअ रेग्मीले बताए ।
कुनै व्यक्तिले आफ्नो नागरिकता बनाउनु पर्यो भने आवश्यक कागजपत्र लिएर प्रशासनमा बुझाएपछि फाँटका कर्मचारीले हेरेर कागजात पुग्यो भनेको न्युनतम एक घण्टाभित्रमा नागरिकता दिने गरी ‘सेवा प्रवाह समय कार्ड’ लागू गरिने प्रजिअले बताए । शुक्रबारदेखि सुरु गरिएको ‘सेवा प्रवाह समय कार्ड’ प्रणाली सफल भए प्रशासनबाट प्रवाह हुने मुख्यतः संस्था नवीकरण, नागरिकता प्राप्ति, नाबालिग परिचयपत्र, मुद्दा पेशी तोक्ने, मुद्दाको तारिख, प्रिन्ट भएर आएका राहदानी वितरण, जिल्ला प्रशासनले गर्ने विभिन्न सिफारिसलाई समयबद्ध बनाइने योजना रहेको रामेछाप प्रशासनले बताएको छ ।
‘सेवा प्रवाह समय कार्ड’ भएपछि सेवाग्राहीले आफ्नो काम सम्पन्न हुने समय थाहा पाउने छन् । उपप्रधानमन्त्री एवं गृहमन्त्री रवि लामिछानेले केहि दिन अघि मात्रै प्रमुख जिल्ला अधिकारीहरुसँगको भर्च्युएल बैठकमा नागरिकको सेवालाई प्रभावकारी रुपमा सेवा दिन समय कार्ड लागु गरेर काम गर्न निर्देशन दिएका थिए ।
