रामेछाप- मन्थली नगरपालिकाले आफ्नो नगर क्षेत्र भित्र रहेका पर्यटकीय स्थलहरुको पहिचान गर्दै पर्यटन क्षेत्रको व्यवस्थित विकास गर्ने योजना अगाडि सारेको छ । विहिबार मन्थली नगरपालिका वडा नं ९ पुरानागाउँ स्थित थानापति महादेव मन्दिर परिसरमा कार्यपालिकाको बैठक बसेर थानापति विकासको लागि गुरुयोजना बनाएर अगाडि बढ्ने निर्णय गर्दै नगर क्षेत्रभित्रका सम्पूर्ण पर्यटकीय स्थलको विकास गर्ने योजना अगाडि सारेको हो ।
थानापति मन्दिर परिसरमा बसेको कार्यपालिका बैठकको बारेमा जानकारी गराउँदै नगर प्रमुख लव श्रेष्ठले भने, ‘मन्थली नगरका १४ ओटै वडा भित्र रहेका पर्यटकीय क्षेत्रको पहिचान गर्ने र पर्यटन विकासको लागि सबै कार्यपालिकाका सदस्यहरुले साझा धारणा बनाएर गुरु योजना सहित अगाडि बढ्ने संकल्प सहित यहाँ बैठक बसेका छौँ । यसले एउटा साझा धारणा बनाउन सहयोग पुग्छ । जिल्लाकै प्रसिद्ध धार्मिक पर्यटकीय स्थलको रुपमा रहेको थानापति मन्दिर विकासको लागि गुरु योजना बनाउने निर्णय गरेका छौँ । यसैलाई आधार मानेर अन्य वडाका पर्यटकीय स्थलहरुलाई पनि जोड्दै जाने छौँ र नगरको उएटा आम्दानीको रुपमा पर्यटकीय क्षेत्रलाई लिने छौँ ।’
नगरका १४ ओटै वडामा रहेका पर्यटकीय स्थलहरुलाई एउटै मार्गबाट जोड्ने गरी गुरु योजना बनाउने विषयमा पनि बैठकमा बृहत छलफल भएको नगर प्रमुख श्रेष्ठले बताए । बैठकले सामुदायिक विद्यालयको शैक्षिक गुणस्तरलाई राम्रो बनाउने, १४ ओटै वडाको जग्गा वर्गीकरणलाई छिटो टुङ्ग्याउने, वडाबाटै राजस्व तिर्न सकिने गरि योजना बनाउने, जेष्ठ नागरिक तथा अशक्तहरुलाई दिँदै आएको सामाजिक सुरक्षा भत्तालाई सहज बनाउने लगायतका विषयमा छलफल तथा निर्णय गरेको नगर प्रमुख श्रेष्ठले बताए ।
नगरको पर्यटन विकासको दुर्गामी योजना र सहज पहुँच मार्ग निर्माणको लागि बृहत छलफल गर्दा नगरको एउटा बन्द कोठमा भन्दा पनि जहाँको विकासको कुरा गरिन्छ त्यहि गएर छलफल अगाडि बढाउँदा योजना कार्यन्वयन सफल हुने उद्देश्य सहित बैठक थानापति मन्दिर परिसरमा गरिएको मन्थली नगरपालिकाका प्रमुख प्रशासकीय अधिकृत हरिप्रसाद चापागाईले बताए ।
त्यस्तै मन्थली नगरपालिका वडा नं ९ पुरानागाउँका वडाध्यक्ष गोकर्ण राज आराणले मन्थली नगरको कार्यपालिका बैठक नगरको केन्द्र भन्दा बहिर त्यो पनि आफ्नै वडामा हुँदा पर्यटन विकास सँगै वडाको समग्र विकासमा थप सहयोग पुग्ने विश्वास व्यक्त गरेका छन् । उनले जिल्लाकै प्रसिद्ध धार्मिक पर्यटकीय क्षेत्रको रुपमा परिचित थानापती महादेव मन्दिरको प्रचार प्रसारमा समेत यो बैठक उपलब्धमूलक हुने बताए ।
प्रसिद्ध धार्मिक पर्यटकीय क्षेत्रको प्रचार प्रसारमा समेत सहयोग पुग्ने उद्देश्य सहित यस अघि भदौमा भएको अघिल्लो वर्षको नगर समिक्षा बैठकमा वडाले गरेको प्रस्ताव अनुसार नगरको सिंगो टिम नै मन्दिर परिसरमा आएर बैठक बस्नु सकरात्माक सन्देश भएको वडा नं ९ पुरानागाउँका वडा सचिव रामहरि अधिकारीले बताए । उनले बैठकमा भएका निर्णयलाई चाँडै कार्यन्वयनमा लैजन सके वडा नं ९ को मात्रै नभएर समग्र नगरकै पर्यटन प्रवद्र्धनमा सहयोग पुग्ने धारणा राखे ।
थानापती मन्दिर परिसरमा नगर प्रमुख लव श्रेष्ठको अध्यक्षमा भएको छैठौँ कार्यपालिकाको बैठकमा नगर उपप्रमुख इश्वरी बस्नेत, प्रमुख प्रशासकीय अधिकृत हरिप्रसाद चापागाई, १४ वटै वडाका वडाध्यक्ष, कार्यपालिका सदस्यहरु, मन्थली नगरपालिकाका उपसचिव हेमन्त कुमार बुढाथोकी लगायतको सहभागिता रहेको थियो ।
