रामेछाप– रामेछाप प्रदेश सभा (क) मा लोकतान्त्रिक बाम गठबन्धनले पहिलो चरणको कार्यक्रम सम्पन्न गरेको छ । असोज ३१ गते देखि नेपाली काँग्रेस र नेकपा माओवादी केन्द्रले संयुक्त रुपमा सुरु गरेको वडा स्तरीय सभा तथा मतदाता भेटघाट कार्यक्रम बुधबार सम्पन्न भएको हो ।
रामेछाप प्रदेश सभा (क) को लिखुतामाकोशी गाउँपालिका वडा नं ५ नागदहबाट सुरु भएको अभियान मन्थली नगरपालिका वडा नं ५ सुनारपानीमा आइपुगेर सम्पन्न भएको हो । वडा स्तरीय सभा तथा मतदाता भेटघाट कार्यक्रममा काँग्रेसबाट प्रतिनिधि सभा सदस्यको उम्मेद्वार रहेका पुर्ण बहादुर तामाङ कान्छाराम र माओवादीबाट प्रदेश सभा सदस्यको उम्मेद्वार रहेका तारानारायण श्रेष्ठ सहित नेपाली काँग्रेस तथा नेकपा माओवादी केन्द्रका नेता तथा कार्यकर्ता र आम मतदाताको सहभागितमा रहेको थियो ।
रामेछाप प्रदेश सभा (क) भित्र रहेका ३२ वटा वडा मध्ये ३१ वडा वडाको विभिन्न ठाउँमा भएका वडा स्तरीय सभा तथा मतदाता भेटघाटका क्रममा मतदाताहरुले आफ्नो वडा तथा टोलमा रहेका समस्याहरु उम्मेद्वारहरुलाई राखेका थिए । मतदाताहरुले वडा तथा टोलमा भएका समस्याहरु राखेपछि उम्मेद्वारहरुले स्थानीय नागरिकहरुले विगत देखि भोग्दै आएका विभिन्न समस्याहरुलाई गठबन्धनमा आबद्ध रहेका दलहरुका केन्द्रीय घोषणा पत्र र आफूहरुले संयुक्त रुपमा तयार पारेको प्रतिबद्धता पत्रमा समधान गर्ने गरी उल्लेख गरेको बताउँदै निर्वाचित भएपछि क्रमशः पुरा गर्दै जाने प्रतिबद्धता जनाएका छन् ।
अभियानको क्रममा लोकतान्त्रिक बाम गठबन्धन गरेर चुनाब लड्नुको कारण बताउँदै जनताको लामो संघर्षपछि बनेको संविधान नै सिध्याउने गरी केपी ओली नेतृत्वमा रहेको नेकपा एमालेले संविधन विपरित काम गर्न थालेपछि परिवर्तनकारी दल नेपाली काँग्रेस, नेकपा माओवादी केन्द्र लगायतका दलहरु मिलेर संविधान बचाउन गठबन्धन गरेर चुनावमा आएको दावी गरेका छन् ।
रामेछाप प्रदेश सभा (क) का ३२ वडा मध्ये मन्थली नगरपालिका वडा नं ३ कठजोरमा कार्यक्रम हुन बाँकी रहेको र उक्त ठाउँमा फेरि मिति तय गरेर कार्यक्रम गरिने नेपाली काँग्रेस जिल्ला कार्य समिति रामेछापका उपसभापति लेख बहादुर कार्कीले बताए । उपसभापति कार्कीका अनुसार रामेछाप प्रदेश सभा (ख) को कार्यक्रम पनि मन्थली नगरपालिका वडा नं ६ भलुवाजोरबाट बुधबार देखि सुरु भएको छ ।
