रामेछाप– मंसिर ४ गते हुने प्रतिनिधि सभा सदस्य र प्रदेश सभा सदस्य निर्वाचनको लागि रामेछापबाट काँग्रेस–माओवादी गठबन्धनले उम्मेद्वारी दर्ता गराएको छ । मुख्य निर्वाचन अधिकृतको कार्यालय मन्थलीमा आइतबार अपरान्ह साढे ४ बजे गठबन्धनका उम्मेद्वारहरुले संयुक्त रुपमा उम्मेद्वारी दर्ता गराएका हुन् ।
प्रतिनिधि सभा सदस्यको लागि जिल्ला सभापति समेत रहेका नेपाली काँग्रेसका पुर्ण बहादुर तामाङ (कन्छाराम) ले उम्मेद्वारी दर्ता गराएका छन् । त्यस्तै रामेछाप प्रदेश सभा (क) को लागि नेकपा माओवादी केन्द्रका तारानारायण श्रेष्ठ र रामेछाप प्रदेश सभा (ख) को लागि माओवादीकै युवराज चौलागाईंले उम्मेद्वारी दर्ता गराएका छन् ।
उम्मेद्वारी दर्ता गराउँदै प्रतिनिधि सभाका उम्मेद्वार पुर्ण बहादुर तामाङ (कान्छाराम) ले आफ्नो उम्मेद्वारी रामेछापको समग्र विकासको लागि भएको बताएका छन् । यस अघि पनि आफ्नो व्यक्तिगत सहयोगमा रामेछापको विकास गरिरहेको बताउँदै मंसिर ४ पछि एउटा सरकारको प्रतिनिधि भएर विकास गर्ने चहाना रहेको र त्यो चहाना जनताले पुरा गरिदिने उनले विश्वास व्यक्त गरे । २०७४ को निर्वाचनमा प्रतिनिधि सभा सदस्यमा आफूले थोरै मतले मात्रै पराजित भएको स्मरण गर्दै उम्मेद्वार तामाङले यो पटक एमालेका उम्मेद्वारको भन्दा दोब्बर मतले आफूले जित हाँसिल गर्ने तथ्यांक समेत प्रस्तुत गरेका थिए ।
रामेछाप प्रदेश सभा (क) का उम्मेद्वार तारानारायण श्रेष्ठले रामेछापमा रहेको प्राकृतिक स्रोतको समुचित प्रयोग गरेर जनताको चहाना र अपेक्षालाई पुरा गर्दै समृद्ध रामेछाप बनाउने संकल्प सहित आफू उम्मेद्वार भएको बताए । २०६४ को संविधान सभा सदस्य हुँदा देखि अहिले सम्म आफू कुनै पनि विवादमा नमुछिएको र सधैं जनताको पक्षमा लागीरहेकाले पनि आफ्नो जित निश्चत रहेको उनले दावी गरे । त्यस्तै रामेछाप प्रदेश सभा (ख) का उम्मेद्वार युवराज चौलागाईंले भौतिक विकासको मात्रै नभइ मानविय विकास र जनताको विकासको लागि आफ्नो उम्मेद्वारी रहेको बताए । रामेछाप प्रदेश सभा (ख) मा माओवादी केन्द्रको राम्रो उपस्थिति रहेको र गठबन्धनमा रहेका अन्य दलहरुको पनि राम्रो मत भएकाले आफ्नो जित निश्चित रहेको उम्मेद्वार चौलागाईंले दावी गरे ।
काँग्रेसबाट प्रतिनिधि सभा सदस्यको लागि उम्मेद्वारी दर्ता गराउने तामाङ २०७४ को निर्वाचनमा पनि काँग्रेसको तर्फबाट उम्मेद्वार थिए । राजनीतिसँगै सामाजिक विकासमा सक्रिय तामाङले २०७४ को निर्वाचनमा एमाले–माओवादी गठबन्धनका उम्मेद्वारसँग थोरै मतले पराजित भएका थिए । त्यस्तै रामेछाप प्रदेश सभा (क) का उम्मेद्वार तारानारायण श्रेष्ठ संविधान सभा सदस्य हुन् भने अहिले उनि नेकपा माओवादी केन्द्र रामेछाप जिल्ला समन्वय कमिटीको सचिव छन् । त्यसैगरी चौलागाईं नेकपा माओवादी केन्द्रको पोलिटब्यूरो सदस्य हुन् । चौलागाईं पहिलो पटक निर्वाचनमा होमिएका उम्मेद्वार हुन् ।
नेकपा एमालेबाट यस अघि दिउँसो नै प्रतिनिधि सभा सदस्यको लागि कैलाश प्रसाद ढुंगेलले उम्मेद्वारी दर्ता गराइसकेका छन् भने रामेछाप प्रदेश सभा (क) को लागि शान्ति प्रसाद पौडेल र रामेछाप प्रदेश सभा (ख) को लागि मिलन कुमार घिसिङले उम्मेद्वारी दर्ता गराइसकेका छन् ।
