रामेछाप– मंसिर ४ गते हुने प्रतिनिधि सभा सदस्य र प्रदेश सभा सदस्य निर्वाचनको लागि रामेछापबाट एमालेले उम्मेद्वारी दर्ता गराएको छ । मुख्य निर्वाचन अधिकृतको कार्यालय मन्थलीमा आइतबार दिउँसो एमालेका उम्मेद्वारहरुले उम्मेद्वारी दर्ता गराएका हुन् ।
एमालेबाट प्रतिनिधि सभा सदस्यको लागि कैलाश प्रसाद ढुंगेलले उम्मेद्वारी दर्ता गराएका छन् । त्यस्तै रामेछाप प्रदेश सभा (क) को लागि शान्ति प्रसाद पौडेल र रामेछाप प्रदेश सभा (ख) को लागि मिलन कुमार घिसिङले उम्मेद्वारी दर्ता गराएका छन् ।
उम्मेद्वारी दर्ता गराउँदै प्रतिनिधि सभाका उम्मेद्वार कैलाश प्रसाद ढुंगेलले आफ्नो उम्मेद्वारी रामेछापको विकासको लागि भएकाले आफ्नो जित निश्चित रहेको बताए ।
रामेछाप प्रदेश सभा (क) का उम्मेद्वार शान्ति प्रसाद पौडेलले संघीयताको सुन्दर पक्षका रुपमा रहेको प्रदेश सरकारका अधिकारहरुलाई स्थापित गराउन र रामेछाप प्रदेश सभा (क) को समग्र विकासको लागि आफ्नो उम्मेद्वारी रहेको दावी गरे । त्यस्तै रामेछाप प्रदेश सभा (ख) का उम्मेद्वार मिलन कुमार घिसिङले सामाजिक रुपले पछाडि पारिएका समुदायको अधिकार स्थापित गराउँदै रामेछाप प्रदेश सभा (ख) को विकासको लागि आफूले उम्मेद्वारी दिएको बताए ।
एमालेबाट प्रतिनिधि सभा सदस्यको लागि उम्मेद्वारी दर्ता गराउने ढुंगेल यस अघि बागमती प्रदेश सभाका लागि रामेछाप प्रदेश सभा (ख) बाट एमाले र माओवादीको गठबन्धनबाट प्रदेश सभा सदस्यमा निर्वाचित भएका थिए । त्यस्तै रामेछाप प्रदेश सभा (क) का उम्मेद्वार शान्ति प्रसाद पौडेल पनि एमाले र माओवादीको गठबन्धनबाट बागमती प्रदेश सभा सदस्यमा निर्वाचित भएका थिए । रामेछाप प्रदेश सभा (ख) का उम्मेद्वार मिलन कुमार घिसिङ भने राजनीतिमा नयाँ अनुहार हुन् ।
गठबन्धनको तर्फबाट प्रतिनिधि सभाको लागि टिकट पाएका नेपाली काँग्रेसका पुर्ण बहादुर तामाङ (कान्छाराम) तथा दुई प्रदेश सभामा नेकपा माओवादी केन्द्रबाट टिकट पाएका तारानारयण श्रेष्ठ र युवराज चौलगाईंले भने अपरान्ह ४ बजे पछि मात्रै उम्मेद्वारी दर्ता गराउने गरी तयारी भइरहेको नेपाली काँग्रेस रामेछापका सचिव दीपक खड्काले बताए ।
अन्य साना दलले भने उम्मेद्वारी दर्ता गराइरहेका मुख्य निर्वाचन अधिकृतको कार्यालयले जनाएको छ ।
