रामेछाप– रामेछापको खाँडादेवी गाउँपालिका वडा नं ३ भिरपानीमा यात्रुवाहक बस दुर्घटना हुँदा १३ जना यात्रु घइते भएका छन् । खाँडादेवी गाउँपालिका कै वडा नं ७ बाट काठमाण्डौका लागि छुटेको बा ३ ख ४०४८ नम्बरको सुन्दरीमाई यातायातको यात्रुवाहक बस भिरपानीको धारापानीमा दुर्घटना हुँदा १३ जना घाइते भएका हुन् ।
घाइते हुनेहरुमा खाँडादेवी गाउँपालिका वडा नं ७ पात्लेका युबराज तामाङ, अजय तामाङ, सुस्मिता तामाङ, रस्मि तामाङ, सपना तामाङ, रमेश तामाङ, बास्ना घिसिङ, बिकाश तामाङ, श्याम लामा, रिता घिसिङ, प्रेरणा श्रेष्ठ, सुमित्रा कार्की र धनराज तामाङ रहेका छन् ।
घाइते १३ जना मध्ये रिता घिसिङको अवस्था गम्भिर रहेको जिल्ला प्रहरी कार्यालय रामेछापका प्रहरी प्रमुख प्रहरी नायव उपरिक्षक राजकुमार थिङले जानकारी दिए । थिङका अनुसार घाइते सबैको उद्दार गरेर धुलिखेल अस्पतालमा उपचारको लागि पठाइसकिएको छ ।
आइतबार विहान करिव ११ बजे दुर्घटना भएको बस दुर्घटना स्थलबाट करिव तीन मिटर तल खसेको घटना स्थलमा पुगेका प्रहरी प्रमुख राजकुमार थिङले जानकारी बताए ।
दुर्घटना भएको यात्रुवाहक बस यस अघि उक्त रुटमा नचलेको र चालकका लागि नयाँ रुट भएर दुर्घटना भएको हुन सक्ने प्रहरीले प्रारम्भिक अनुमान गरेको छ । दुर्घटना र दुर्घटनामा परेको बसको बारेमा थप सोधपुछ गर्न बसका सहचालकलाई जिल्ला प्रहरी कार्यालयमा ल्याउन लागिएको थिङले बताए । बसका चालक पनि घाइते रहेको उनले बताए ।
