रामेछाप- रामेछाप नगरपालिकाका नगर प्रमुख लवश्री न्यौपानेले बालबालिकाको भविष्य सुरक्षित गर्ने मुख्य जिम्मेवारी अभिभावकको रहेको बताएका छन् । रामेछाप नगरपालिकाले ५८ औँ राष्ट्रिय बाल दिवसको अवसरमा आयोजना गरेको हाजिरीजवा र नृत्य प्रतियोगिता कार्यक्रममा आफ्नो भनाई राख्दै नगर प्रमुख न्यौपानेले बालबालिकाको भविष्य सुनिश्चित र सुरक्षित गर्ने मुख्य जिम्मेवारी अभिभावकको हुने बताएका हुन् ।
अहिले पनि अधिकासं अभिभावकहरुले विद्यालयमा अध्ययनरत बालबालिकालाई उसको पढाइलाई नै असर पुग्ने गरी घरायसी काममा लगाउँने गरेको र त्यस्ता कामले गर्दा बालबालिकालाई पढाइमा भन्दा पनि घरायसी काममा ध्यान केन्द्रित भई उसको पढाई बिग्रेर भविष्य नै अन्धकार हुने हुँदा अब अभिभावकले बालबालिकाको चाहान अनुसार सहयोग गर्नु पर्ने धारणा राखे । नगर प्रमुख न्यौपानेले आफ्ना छोराछोरीलाई मायाका साथ विद्या आर्जन गर्नमा प्रेरित गर्न आग्रह गरे ।
रामेछाप नगरपालिकाले आगामी चैत्र महिना भित्र नगरलाई बालमैत्री नगर घोषणा गर्ने गरी अभियान चलाएकाले उक्त अभियानमा सबैलाई सहयोग गर्न अनुरोध गरेका छन् ।
त्यस्तै नगर उपप्रमुख बाल कुमारी कार्कीले बालबालिकाहरुकै सहभागीतमा ५८ औँ राष्ट्रिय बाल दिवस मनाउँदै गर्दा अझै पनि केही बालबालिकाहरु बाल दिवस मनाउनबाट बञ्चित रहेको बताउँदै त्यस्ता बालबालिकाहरुलाई पनि आगामी दिनमा सहभागी गराउने गरी सबैले अभियान चलाउनु पर्ने धारणा रखिन् । उपप्रमुख कार्कीले यस्ता दिवसीय कार्यक्रमहरुमा मात्रै नभएर नगर भित्र रहेका बालबालिकाहरुको सहयोगका लागि नगरपालिकाले विभिन्न कार्यक्रम बनाएर कार्यन्वयनमा जाने प्रतिवद्धता व्यक्त गरिन् ।
कार्यक्रममा बोल्दै रामेछाप नगरपालिकाका प्रमुख प्रशासकीय अधिकृत रामचन्द्र लामगादेले बाल अधिकारको संरक्षण र प्रवद्र्धनको लागि परिवार, समाज र राष्ट्रले आ–आफ्नो ठाउँबाट जिम्मेवार भएर लग्नु पर्ने बताए ।
रामेछाप नगरपालिकाका प्रवक्ता समेत रहेका रामेछाप नगरपालिका वडा नं ७ का वडाध्यक्ष समिर कार्कीले यस्ता दिवसीय कार्यक्रममा बोलिएका कुराहरुलाई घरपरिवार, बालबालिका र सरोकारवालाहरुले ब्यवहारमा लागु गर्न सके अहिले बालबालिकाले भोग्दै आएका समस्या समधान हुने धारणा राख्दै ब्यवहारमा लागु गर्न सबै लाग्नु पर्नेमा जोड दिए ।
त्यस्तै नेपाल पत्रकार महासंघ रामेछापका पुर्व सभापति हिमाल ढुंगेलले जिल्लामा यस्ता दिवसीय कार्यक्रम विगत लामो समय देखि मनाउँदै आएको भएपनि अझै पनि बाल अधिकार हनन् भइरहेको बताए । उनले यस्ता दिवसीय कार्यक्रममा बालबालिकालाई भन्दा पनि अभिभावकहरुलाई सहभागी गराएर सचेत गराउने गरी स्थानीय तहहरुले अभियान चलाउनु पर्ने बताए ।
प्रमुख प्रशासकीय अधिकृत रामचन्द्र लामगादेको अध्यक्षता तथा नगर प्रमुख लवश्री न्यौपानेको प्रमुख आतिथ्यतामा भएको कार्यक्रममा मावि स्तरीय हाजिरीजवाफ प्रतियोगित, निमावि स्तरीय एकल नृत्य प्रतियोगिताको आयोजनासँगै २०७८ को एसइइ परिक्षामा उत्कृष्ट भएका विद्यार्थीलाई नगद पुरस्कार सहित सम्मान गरिएको थियो ।
रामेछाप नगरपालिका आयोजक रहेको कार्यक्रममा माइती नेपाल काठमाण्डौ, रामेछाप बिजनेश एण्ड प्रोफेशनल वमेन रामेछाप र समाज सेवा जागृत महिला बचत तथा ऋण सहकारी रामेछापले पनि समन्वय गरेका थिए ।
