रामेछाप- गत चैत्र २५ गते आगलागीबाट घरबास गुमाएका पीडितलाई गुञ्जबहादुर कार्कीले ५५ हजार सहयोग गरेका छन् । स्थानीय समेत रहेका कार्कीले रामेछाप नगरपालिका वडा नंं. ७ सुकाजोरका आगलागी पीडित ११ घरपरिवारलाई प्रति परिवार पाँच हजारका दरले हुने गरी आर्थिक सहयोग गरेका हुन् ।
आगलागी भएकै दिन घटना स्थलमा पुगेर आर्थिक सहयोग गर्ने प्रतिबद्धता गरेको कार्कीले रामेछाप आगलागी पुनः स्थापना राहत संकलन कोषको खातामा ५५ हजार नगद जम्मा गरेका हुन् । नेपाली काँग्रेस जिल्ला कार्य समिति रामेछापका सदस्य समेत रहेका कार्कीले तत्कालिन अवस्थामा सहयो गर्ने बाचा गरे अनुसार सहयोग रकम खातामा जम्मा गरिदिएको बताए । बस्ती पुनः स्थापना गर्नको लागि भविष्यमा आफूले अन्य सहयोग गर्ने पनि कार्कीले बताएका छन् ।
सहयोगलाई एकद्वार प्रणाली मार्फत जम्मा गरेर घर विहिन बनेका परिवारलाई एउटा बस्तीको रुपमा विकास गर्ने गरी रामेछाप नगरपालिकाले रामेछाप आगलागी पुनः स्थापना राहत संकलन कोष स्थापना गरेको थियो ।
आगलागीबाट धन बहादुर श्रेष्ठ, ठेक बहादुर मगर, एकलाल श्रेष्ठ, हिमलाल श्रेष्ठ, चिरन्जीवी श्रेष्ठ, इश्वरीलाल श्रेष्ठ, धन बहादुर मगर, दल बहादुर मगर, भिमलाल श्रेष्ठ र चेत बहादुर मगरको घर जलेर नष्ट भएको थियो ।
