रामेछाप- रामेछापको खाँडादेवी गाउँपालिका र दोरम्बा शैलुङ्ग गाउँपालिकामा काँग्रेस–माओवदी तालमेल भएको छ । रामेछाप प्रदेश सभा (ख) मा पर्ने दुई गाउँपालिकामा दुई पार्टी बीच अध्यक्ष र उपाध्यक्ष पदमा तालमेल गरेर जाने सहमती भएको दोरम्बा शैलुङ्ग गाउँपालिकाको अध्यक्षको उम्मेद्वार समेत रहेका नेकपा माओवदी केन्द्र रामेछापका संयोजक मैन कुमार मोक्तानले बताए ।
दोरम्बा शैलुङ्ग गाउँपालिकामा माओदी केन्द्रले अध्यक्ष र नेपाली काँग्रेसले उपाध्यक्ष पाउने गरी तालमेल गरिएको संयोजक मोक्तानले बताए । दुई पार्टी तालमेल गरेर जाने सहमती भएपछि काँग्रेसबाट अध्यक्षको उम्मेद्वार बनेका मान बहादुर लामाले आफ्नो उम्मेद्वारी फिर्ता लिएर माओवादीका उम्मेद्वार मैन कुमार मोक्तानलाई सघाउने सहमती भएको माओवादी केन्द्रले बताएको छ । त्यस्तै माओवादीबाट उपाध्यक्षको उम्मेद्वार बनेकी देउकुमारी मगरले आफ्नो उम्मेद्वारी फिर्ता लिएर काँग्रेसबाट उम्मेद्वार बनेकी खमला थापामगरलाई सघाउने गरी तालमेल भएको बताइएको छ ।
दोरम्बा शैलुङ्ग गाउँपालिकाको अध्यक्ष, उपाध्यक्ष र केही वडामा समेत तालमेल गरिएको संयोजक मोक्तानले बताए ।
खाँडादेवीमा पनि तालमेल, काँग्रेसलाई अध्यक्ष माओवादीलाई उपाध्यक्ष
खाँडादेवी गाउँपालिकामा पनि नेपाली काँग्रेस र माओवादी केन्द्र बीच तालमेल गरेर जाने सहमती भएको छ । शुक्रबार दुई पार्टी बीच केन्द्रीय निर्देशन अनुसार तालमेल गरेर जाने सहमती भएको नेपाली काँग्रेस खाँडादेवी गाउँपालिकाका सभापति तेज घिसिङले बताए । सहमती अनुसार खाँडादेवी गाउँपालिकाको अध्यक्ष काँग्रेसले र उपाध्यक्ष माओवादी केन्द्रले पाउने गरी तालमेल भएको सभापति घिसिङले बताए ।
माओवादी केन्द्रले काँग्रेसका उम्मेद्वार नवराज थोकरलाई अध्यक्षमा सघाउने र काँग्रेसले माओवादी केन्द्रको तर्फबाट उपाध्यक्षको उम्मेद्वार बनेका मान बहादुर लामालाई सघाउने सहमती भएको घिसिङले बताए ।
तालमेल हुने भएपछि काँग्रेसबाट खाँडादेवी गाउँपालिकाको उपाध्यक्षको उम्मेद्वार बनेकी चण्डिका उप्रेतीलाई काँग्रेसले उम्मेद्वारी फिर्ता गर्न लगाएको छ । माओवादी केन्द्रको भने खाँडादेवीमा अध्यक्ष पदको उम्मेद्वार थिएन् । खाँडादेवी गाउँपालिकामा यस अघि माओवादी केन्द्र र नेकपा एकीकृत समाजवादी बीच तालमेल गरेर जाने सहमती भएको थियो ।
