रामेछाप- नेपाली काँग्रेस रामेछापले ‘घर घर जाउँ, काँग्रेस जिताऔं’ अभियानलाई प्रभाकारी बनाउँदै पार्टीको तल्लो तहको संगठनलाई बढी सक्रिय बनाउने भएको छ । सोमबार पत्रकार सम्मेलन गरेर नेपाली काँग्रेस रामेछापले स्थानीय तहको चुनावलाई लक्षित गरेर पार्टीको तल्लो तहको संगठन टोल समिति मार्फत ‘घर घर जाउँ, काँग्रेस जिताऔं’ अभियानलाई प्रभाकारी बनाउने गरी ९ गतेबाट कार्यक्रमहरु सुरु गरिने बताएको हो ।
चुनावी प्रचार प्रसार मात्रै नभएर आम नागरिकका समस्या र गुनासोलाई समेत मध्यनजर गरेर गाउँ केन्द्रित गरिएको कार्यक्रममा विकास निर्माण र स्थानीय सरकारले गरेका कमीकमजोरी बारेमा जानकारी लिने, संठगन सुधारका उपायहरुका बारेमा टोल समितिबाट राय लिने लगायतका विषयमा अभियान केन्द्रित हुने जिल्ला सभापति पुर्ण बहादुर तामाङ (कान्छारम) ले बताए । स्थानीय तहको निर्वाचनमा पार्टीलाई जिताउन पार्टी भित्रका आन्तरिक कुरालाई बिर्सेर एक भएर चुनावी अभियानमा लाग्नु पर्ने सभापति तामाङको भनाई रहेको छ ।
अभियनका क्रममा जनताको घर–घरमा पुग्ने काँग्रेस प्रतिनिधिले नेपाली काँग्रेसले गरेका राम्रा कामको बारेमा जानकारी गराउँदै एमसीसीको बारेमा जनतामा रहेको भ्रम र यथार्थको बारेमा प्रष्ट परिने उपसभापति लेख बहादुर कार्कीले बताए । पार्टीको केन्द्रीय अभियान अन्तरगत फागुन २९ गतेबाट ‘घर घर जाउँ काँग्रेस जिताऔं’ अभियान रामेछापमा पनि सुरु भइसकेको र अभियानलाई थप प्रभावकारी बनाउने गरी चैत्र ९ गतेबाट जिल्ला कार्यसकितिका पदाधिकारीको नेतृत्वमा सबै पालिकामा कार्यक्रम गरिने उपसभापति कार्कीले बताए ।
पत्रकार सम्मेलनमा प्रवक्ता नारायणवहादुर बोगटीले ‘घर घर जाउँ, काँग्रेस जिताऔं’ अभियान संचालनका लागि ८ स्थानीय तहमा पार्टीले संयोजक तोकेका नेताको नेतृत्वमा टोली परिचालन भइसकेको बताए ।
अभियानको लागि रामेछाप नगरपालिकामा काँग्रेस उप–सभापती लेखबहादुर कार्की, मन्थली नगरपालिकामा सचिब बिनोद कार्की, खाँडादेवी गाउँपालिकामा उप–सभापती नबराज थोकर, गोकुलगंगा गाँउपालिकामा सचिव दिपक खड्का, सुनापती गाँउपालिमा सह–सचिव धुर्व प्रसाद चौलागाई, लिखु तामाकोशी गाँउपालिकामा सह–सचिव कमल योन्जन, दोरम्बा शैलुङ्ग गाँउपालिकामा कोषाध्यक्ष लबबहादुर थापामगर र उमाकुण्ड गाउँपालिकामा प्रबक्ता नारायण बहादुर बोगटीलाई यस अघि नै संयोजक तोकीसकेको छ ।
