रामेछाप– कोरोना भाइरसको तेस्रो लहर सुरु भएसँगै नेपालमा संक्रमण दर तीव्र हुँदै गएको छ । पहिलो र दोस्रो लहरको तुलनामा यो पटक भने दैनिक संक्रमित हुनेको संख्या बढी देखिन थालेको छ । पछिल्लो २४ घण्टामा शनिबार पीसीआर विधिबाट गरिएको परीक्षणमा ५६ दशमलव ८ प्रतिशत मानिसमा कोरोना संक्रमण देखिएको छ । जसको कारण कोरोना भाइरस फैलन सुरु भएको नेपालमा एक महिना नपुग्दै दैनिक संक्रमितको संख्या दश हजार भन्दा बढी हुन थालेको छ । त्यस्तै पछिल्लो २४ घण्टामा कोरोना भाइरसकै कारण १६ जनाले ज्यान गुमाएका छन् ।
देशैभरी तीव्र रुपमा फैलिइ रहेको कोरोना भाइरस रामेछापमा त्यहि गतिमा फैलिइरहेको छ । पौष महिनाको २३ गते देखिको तथ्यांकलाई हेर्दा रामेछापमा १५ दिनको अवाधिमा झण्डै दुई सय मानिसमा कोरोना भाइरस संक्रमण पुष्टि भएको छ । पौष २३ गते एक जनाको एन्टीजेन विधिबाट परीक्षण गर्दा नेगेटिभ देखिएको थियो भने पौष ३० गते ५७ जनाको कोरोना परीक्षण गर्दा २५ जनामा कोरोना भाइरस संक्रमण देखिएको थियो । गत पौष महिनाको एक हप्तामा परीक्षण गरिएका ८ दिनमा सबै भन्दा ३० गते २५ जना अर्थात ४३ प्रतिशतमा कोरोना संक्रमण देखिएको थियो । यसरी पौष महिनाको एक हप्ताको दैनिक तथ्यांक अनुसार कोरोना संक्रमण हुने व्यक्तिको संख्या बढ्नुका साथै संक्रमण दर पनि बृद्धि हुँदै गएको थियो । पौष महिनाको एक हप्तामा जम्मा ३८ जनामा कोरोना भाइरस पुष्टि भएको देखिएको छ ।
माघ महिनाको एक हप्ता अर्थात १ गते देखि ८ गते सम्मा आइपुग्दा कोरोना संक्रमण हुनेको संख्या ३८ बाट बढेर १ सय ९९ पुगेको छ । माघ महिनाको एक हप्ताको तथ्यांकलाई हेर्दा ६ गते ३५ जनामा कोरोना भाइरस पुष्टि भएको थियो । ६ गते ४२ जनाको परीक्षण गर्दा ३५ जना अर्थात ८३ दशमलव ३ प्रतिशतमा कोरोना पुष्टि भएको थियो । ८ गते १३ जनाको परीक्षण गराउदा ३ जनामा मात्रै कोरोना भाइरस पुष्टि भएको स्वास्थ्य कार्यालय रामेछापले बताएको छ ।
करिव आधा महिनाको अवाधिमा १ सय ९९ जनामा कोरोना भाइरस संक्रमण पुष्टि हुँदा ५१ जनाले कोरोनालई जितेर सामान्य अवस्थामा फर्केको र १ सय ४८ जना सक्रिय संक्रमित रहेको स्वास्थ्य कार्यालय रामेछापका जनस्वास्थ्य अधिकृत भुवन थापाले बताए । थापाका अनुसार संक्रमितको स्वास्थ्य अवस्था सामान्य रहेको र सबै संक्रमितहरु होम आइसोलेशनमा रहेका छन् ।
प्रहार खबर साप्ताहिकमा २०७८ माघ ९ गते आइतबार प्रकाशित
