रामेछाप– नेपाली काँग्रेस रामेछापको कोषाध्यक्षमा लब बहादुर थापामगर चयन भएका छन् । नेपाली काँग्रेस जिल्ला कार्य समिति रामेछापको सोमबार बसेको चौथो बैठकले थापामगरलाई कोषाध्यक्षमा चयन गरेको हो ।
काँग्रेस सभापति पूर्ण बहादुर तामाङ (कान्छाराम) ले समितिको बैठकमा निर्वाचित जिल्ला कार्य समिति सदस्य मध्येबाट लब बहादुर थापामगरको नाम कोषाध्यक्षमा प्रस्ताव गरेपछि जिल्ला कार्यसमितिले त्यही नामलाई अनुमोदन गर्दै सर्वसम्मतिले कोषाध्यक्ष चयन गरेको जिल्ला सचिव दीपक खड्काले जानकारी दिए । थापामगर नेपाली काँग्रेसको १४ औँ जिल्ला अधिवेशनमा भूगोल अन्तरगत दोरम्बा गाउँपालिकाबाट खुल्ला जिल्ला कार्य समिति सदस्यमा निर्वाचित भएका थिए ।
त्यस्तै काँग्रेस जिल्ला कार्यसमितिको बैठकले विभिन्न क्षेत्र हेर्ने गरी दुई समिति र विभिन्न ९ जिल्ला शाखा गठन गरेको छ । गठन भएको समिति तथा शाखाहरुको संयोजक चयन गर्दै केही सदस्य समेत तोकिएको पार्टी सचिव दीपक खड्काले जानकारी दिए । खड्काका अनुसार जिल्ला प्रशिक्षाण शाखाको संयोजकमा जिल्ला पार्टी उपसभापति नवराज थोकर चयन भएका छन् भने जिल्ला कार्यसमितिका सदस्यहरु संयोजक रहनेगरी जिल्ला लेखा समितिको संयोजकमा ढाकाल बहादुर थापा र जिल्ला अनुशासन समितिको संयोजकमा कमल प्रकाश सुनुवार चयन भएका छन् ।
त्यसैगरी संगठन शाखाको संयोजकमा सिताराम कार्की, विकास शाखाको संयोजकमा गुञ्जबहादुर कार्की, प्रचार प्रसार शाखाको संयोजकमा हिमाल ढुंगेल, अभिलेख शाखाको संयोजकमा सुमन्त कुमार कार्की, जिल्ला सम्पर्क समितिको संयोजकमा घनश्याम श्रेष्ठ, कार्यक्रम तथा सम्मन्वय शाखाको संयोजकमा कमन खड्का (दिपेन्द्र), युवा तथा खेलकुद शाखाको संयोजकमा जित बहादुर कटुवाल र बालबालिका तथा जेष्ठ नागरिक शाखाको संयोजकमा चिना कार्की चयन भएका छन् ।
त्यस्तै सभापतिले तीन जनालाई आंमन्त्रित जिल्ला कार्यसमितिको सदस्यमा मनोनित गरेका छन् । सभापति तामाङले नवराज ढकाल, तोप बहादुर थापा र मन्जुदेवी पुर्वेलाई आंमन्त्रित जिल्ला कार्यसमिति सदस्यमा मनोनित गरेका हुन् ।
जिल्ला सभापति पूर्ण बहादुर तामाङ (कान्छाराम) को अध्यक्षतामा रामेछाप नगरपालिकाको वडा नं ३ साँघुटारमा बसेको बैठकमा जिल्ला उपसभापति द्वोय लेख बहादुर कार्की र नवराज थोकर, सचिव दीपक खड्का, सहसचिव कमल योञ्जन, केन्द्रीय महाधिवेशन प्रतिनिधिहरु, जिल्ला कार्यसमिति सदस्यहरु, रामेछाप नगरपालिकाका नगर सभापति, नेपाली काँग्रेसबाट निर्वाचित नगर प्रमुख र उपप्रमुख नेपाली काँग्रेस नगर समितिका पदाधिकारी, वडा सभापति, नेपाली काँग्रेसबाट निर्वाचित वडाध्यक्षहरु, रामेछाप नगरपालिकाका नेपाली काँग्रेसका नेता तथा कार्यकर्ताको सहभागिता रहेको थियो ।
