रामेछाप- रामेछाप नगरपालिकाका नगर प्रमुख नर बहादुर थापामगरले पाँच वर्षे कार्यकालको अन्तिम समय सम्ममा आइपुग्दा सयौँ चुनौतीकाबीच पनि झोलामा रहेका कार्यालयलाई विस्थापित गर्दै सुविधायुक्त भवनबाट सेवा दिन थालिएको बताएका छन् । रामेछाप नगरपालिकाको दशौँ नगरसभामा आफ्नो भनाई राख्ने क्रममा नगर प्रमुख थापामगरले आफूहरु निर्वाचित भएर आउँदाको सुरुको दिनलाई सम्झदै त्यतिबेला एउटा झोलामा रहेका वडा कार्यालयहरुलाई आफ्नो पाँच वर्षे कार्यकालको अन्तिममा आइपुग्दा सुविधायुक्त भवनबाट नागरिकलाई सेवा दिन सक्ने अवस्थामा नगर पुगेको बताएका हुन् ।
नगर प्रमुख थापामगरले विगत सम्झदै भने– ‘२०७२ सालको विनासकारी भूकम्पबाट पीडित नागरिकलाई व्यवस्थापन गर्दै नयाँ संविधान अनुसार नीति नियम बनाउँदै काम सिक्दै अगाडि बढीरहयौँ । जसको कारण हामीले अहिले नगरमा विकासको जग बसालेका छौँ । हामी निर्वाचित भएर आउँदा एक वडाबाट अर्को वडामा जान नसक्ने अवस्था थियो । भएका सडकहरु पनि विना मापदण्डका थिए । एक वडाबाट अर्को वडामा जान नसक्ने अवस्थालाई हामीले अहिले सहज रुपमा जान सक्ने बनाएका छौँ । विना मापदण्डका सडकलाई पनि सुधार गरेर सहजै गाडी गुड्ने बनाएका छौँ । त्यस्तै शिक्ष, स्वास्थ्य, कृषि, सामाजिक विकास लगायतका काममा हामीले जग मात्रै हैन, परिणाम नै देखिने गरी काम गर्यौं। यी त केही प्रतिनिधिमूलक काम मात्रै हुन् । हामीले जनताको माग अनुसारका धेरै काम गरेका छौँ ।’
जनप्रतिनिधि र कर्मचारीको संयुक्त प्रयासले नगरमा सबै प्रकारका विकासमा पूर्वाधार बनाउन सफल भएको दावी गर्दै नगर प्रमुखले समृद्ध नगर बनाउने अभियान सुरु भएको बताए । अपेक्षा गरिएका सबै काम पूरा भए भन्ने पक्षमा आफू नरहेको बताउँदै नगर प्रमुखले विकास भन्ने कुरा कहिल्यै पनि पूरा नहुने भएकाले जनताको अवाश्यकता र देशको अवस्था अनुसार पूरा हुँदै जने धारणा राखे ।
कार्यक्रममा नगर उपप्रमुख सृजना खड्काले रामेछाप नगरका नागरिकको अवश्यकता पहिचान गरेर रणनैतिक योजना अनुसार विकास गरिएकाले विकासमा नगरले लिएका लक्ष्य पूरा हुँदै गएको दावी गरिन् । आफूहरु निर्वाचित भएर आएदेखि नागरिकका गुनासो र नागरिकका अपेक्षामा केन्द्रित भएर विकास भइरको बताउँदै उपप्रमुख खड्काले रामेछाप नगरले धेरै नमूनायोग्य काम गरेको धारणा राखिन् ।
आफूले गरेका कामको आफैले राम्रो गरेका छौँ भन्नु भन्दा पनि पाँच वर्षे कार्यकालमा जनपतिनिधिले गरेका कामको मूल्यांकण नगरका जनता र भविष्यले बताउने उपप्रमुख खड्काले बताइन् ।
दशौँ नगरसभाले आर्थिक बर्ष २०७८/०७९ को पुरक विनियोजन विधेक २०७८ र रामेछाप नगरपालिकाका कर्मचारीहरुको सेवा व्यवस्थापन गर्न बनेको विधेक २०७८ सर्वसम्मत रुपमा पारित भएको छ ।
दशौँ नगरसभामा रामेछाप नगरकार्यपालिकाले रामेछाप नगरपालिकाका प्रमुख प्रशासकीय अधिकृत रामचन्द्र लामगादे सहित कार्य सम्पादनमा उत्कृष्ठ ठहरिएका २३ जना कर्मचारीलाई दोसल्ला ओढाएर प्रशंसा पत्र प्रदान गरेर सम्मान गरेको छ ।
नगरसभामा रामेछाप नगरपालिकाको १ नं वडा देखि ९ नं सम्मका वडाध्यक्षहरु, कार्यपालिका सदस्य, वडा सदस्यहरु, विषयगत शाखाका कर्मचारी लगायतको सहभागिता रहेको थियो ।
