रामेछाप- नेकपा एमाले रामेछापको अध्यक्ष पदका लागि तीन जनाले उम्मेद्वारी दर्ता गराएका छन् । शुक्रबार देखि सुरु भएको जिल्ला अधिवेशनमा सहमतिबाटै अध्यक्ष टुंग्याउने प्रयास गरिएको भएपनि सहमती नभएपछि प्रेम बहादुर तामाङ, आनन्द कुमार श्रेष्ठ र झम्क कंडेलले शनिबार साँझ अध्यक्ष पदमा उम्मेद्वारी दर्ता गराएका हुन् । अध्यक्ष पदमा उम्मेद्वारी दर्ता गराउने तामाङ बर्तमान जिल्ला कमिटीका उपाध्यक्ष हुन भने श्रेष्ठ सचिव हुन् । त्यस्तै कंडेल पनि बर्तमान जिल्ला कमिटीका उपसचिव हुन् ।
अध्यक्षमा उम्मेद्वारी दर्ता गराएपछि अध्यक्षका प्रत्यासी प्रेम बहादुर तामाङले आफू बर्तमान उपाध्यक्ष भएकाले पनि अध्यक्ष बन्ने पालो आफ्नो रहेकाले अध्यक्षमा उम्मेद्वारी उम्मेद्वारी रहेको बताए । त्यस्तै अध्यक्षका अर्का उम्मेद्वार आनन्द कुमार श्रेष्ठले नेकपा एमाले पार्टीलाई यहाँ सम्म ल्याउन लामो समय देखि दुःख गर्दै आएको र आगामी दिनमा पार्टीलाई थप बलियो बनाउनको लागि आफूले उम्मेद्वारी दिइएको बताए । त्यसैगरी अध्यक्षका उम्मेद्वार झम्क कंडेलले ३१ वर्ष देखि नेकपा एमालेमा रहेर लामो संघर्ष गरेको बताउँदै अध्यक्ष पदमा आफूले उम्मेद्वारी दिनु स्वभाविक भएको बताए ।
जिल्ला कमिटीको एक उपाध्यक्ष पदमा ६ जनाले उम्मेद्वारी दर्ता गराएका छन् । उपाध्यक्ष पदमा उम्मेद्वारी दर्ता गराउनेमा रमेश वाग्ले, इन्द्रबहादुर तामाङ, नारायण प्रसाद पौडेल, भुवन विक्रम घिमिरे, ध्रुबकुमार कार्की र सुमन कुमार लामा रहेका छन् । त्यसैगरी एक सचिव पदका लागि गोपाल श्रेष्ठ, पुरुषोत्तम कडरिया र दुर्गा श्रेष्ठले उम्मेद्वारी दर्ता गराएका छन् ।
दुई उपसचिव पदको लागि प्रकाशकुमार कार्की, चन्द्र बहादुर मानन्धर, केशवकुमार प्रधान र होतराज ढकालले उम्मेद्वारी दिइएका छन् ।
अध्यक्ष, उपाध्यक्ष, सचिव र उपसचिवमा उम्मेद्वारी परेपछि सदस्यमा समेत उम्मेद्वारी परेको छ । भूगोल अन्तरगतको केही पालिकाबाट सदस्य निर्विरोध निर्वाचित हुनेगरी उम्मेद्वारी दर्ता भएको भएपनि अधिकासं सदस्यहरुमा समहमती नभएपछि धेरैको उम्मेद्वारी परेको निर्वाचन कमिटीका सदस्य शरण कुमार श्रेष्ठले जानकारी दिए । श्रेष्ठका अनुसार पदाधिकारी र सदस्य सहित ९० जना निर्वाचित हुनु पर्नेमा अध्यक्ष, उपाध्यक्ष, सचिव, उपसचिव र सदस्य गरी २ सय जनाको उम्मेद्वारी परेको छ ।
मनोनयन दर्ता गरेका मध्ये केहीले उम्मेद्वारी फिर्ता लिन इच्छुक भए आइतबार विहान ११ बजे सम्मको समय तोकिएको र त्यसपछि मात्रै मतदान प्रक्रियाको तालिका सार्वजनिक हुने बताइएको छ ।
सुरुमा धेरैले उम्मेद्वारी दर्ता गराएपनि सहमतीको प्रयास जारी रहेकाले सकेसम्म सहमतीमानै तेतृत्व टुंग्याउने गरी छलफल जारी रहेको एक नेताले जानकारी दिए ।
जिल्लाका दुई नगरपालिका र ६ गाउँपालिकाको ६४ वडा, विभिन्न विभाग र जनवर्गीय संगठनबाट गरी आठ सय १४ जना मतदाता रहेका छन् ।
प्रहार खबर साप्ताहिकमा २०७८ पौष २५ गते आइतबार प्रकाशित
