रामेछाप- नेपाली काँग्रेसको १४ औँ जिल्ला अधिवेशनबाट निर्वाचित नयाँ जिल्ला कार्यसमितिले आफ्ना कार्यक्रमलाई गाउँ केन्द्रित गरेपछि काँग्रेसलाई फाइदा हुन थालेको छ । जिल्ला अधिवेशन पश्चात पहिलो जिल्ला कार्यसमितिको बैठकले कार्यसमितिको मासिक बैठक प्रत्येक गाउँपालिकामा गर्ने निर्णय गरेको थियो । जिल्ला कार्यसमितिको दोस्रो बैठक उमाकुण्ड गाउँपालिकामा आयोजना गरेको काँग्रेसले त्यही मौका छोपेर काँग्रेस जिल्ला कार्यसमितिका सभापति पूर्ण बहादुर तामाङ (कान्छाराम) सहित पदाधिकारी र सदस्यहरुको सहभागितमा उमाकुण्ड गाउँपालिकाका विभिन्न ठाउँमा कार्यक्रम हुँदा अन्य पार्टीबाट साँढे दुई सय भन्दा बढी मानिस काँग्रेसमा प्रवेश गरेका छन् ।
जिल्ला कार्यसमितिको बैठक आयोजना स्थल उमाकुण्ड गाउँपालिका प्रिति च्यादलुमा वडा ४ र ५ बाट एमाले र माओवादीका दश भन्दा बढी युवाहरु नेपाली काँग्रेसमा प्रवेश गरेको वडा नं ४ का इकाई सभापति अमृत बहादुर कार्कीले बताए ।
त्यस्तै पौष ४ गते नेपाली काँग्रेस उमाकुण्ड गाउँपालिका वडा नं ४ बाम्तीको पार्टी कार्यालय उद्घाटन तथा भेटघाट कार्यक्रममा विभिन्न पार्टी परित्याग गरी २ सय भन्दा बढी नेपाली काँग्रेसमा प्रवेश गरेका छन् । पार्टी सभापति पूर्ण बहादुर तामाङ (कान्छाराम), महाधिवेशन प्रतिनिधि गेल्जे शेर्पा लगायतको उपस्थितिमा भएको कार्यक्रममा नेकपा एमाले, नेकपा माओवादी, राप्रपा लगायतका पार्टी परित्याग गरी दुई सय भन्दा बढी स्थानीयहरु नेपाली काँग्रेसमा प्रवेश गरेको इकाई सभापति चुडामणी श्रेष्ठले जानकारी दिए ।
त्यसैगरी नेपाली काँग्रेस उमाकुण्ड गाउँपालिका वडा नं १ गुम्देलले पौष ५ गते आयोजना गरेको जेष्ठ नागरिक सम्मान तथा कार्यकर्ता भेटघाट कार्यक्रममा पनि विभिन्न पार्टीबाट ५० भन्दा बढी स्थानीयहरु नेपाली काँग्रेसमा प्रवेश गरेको इकाई सभापति ङापेम्बा शेर्पाले बताए । शेर्पाका अनुसार प्रवेश गर्नेहरुमा नेकपामा एमालेमा लामो समय देखि संगठित सदस्य रहेका, माओवादीको जिम्मेवार पदमा रहेका र राप्रपाको वडाध्यक्ष सहितको टोली काँग्रेसमा प्रवेश गरेका छन् ।
विभिन्न पार्टीबाट नेपाली काँग्रेसा प्रवेश गरेका नवप्रवेशीहरुलाई काँग्रेसमा स्वागत गर्दै पार्टी सभापति पूर्ण बहादुर तामाङ (कान्छाराम) ले नवप्रवेशीहरुलाई नेपाली काँग्रेसमा जिम्मेवार बनाउन वडा समितिले विभिन्न ठाउँमा जिम्मेवारी दिएर संगठनलाई थप बलियो बनाउन अनुरोध गरेका छन् । पछिल्लो समय काँग्रेसमा आउनेहरुको जनलहर देख्दा अबको निर्वाचनमा रामेछापका सबै ठाउँमा काँग्रेसको जित निश्चित रहेको सभापति तामाङले दावी गरे ।
प्रहार खबर साप्ताहिकमा २०७८ पौष ११ गते आइतबार प्रकाशित
