रामेछाप- बागमती प्रदेशमा मुख्यमन्त्री राजेन्द्र प्रसाद पाण्डेले राजनीतिक भागबण्डाको लागि नभइ परिणाममुखी कामका लागि मन्त्रालय फुटाएको बताएका छन् । बुधबार साँझ रामेछापको सदरमुकाम मन्थलीमा पार्टी कार्यकर्ता तथा पत्रकारहरुसँग कुरा गर्दै मुख्य मन्त्री पाण्डेले काम गर्ने क्षेत्र धेरै तर मन्त्रालय एउटै हुँदा काम प्राथमिकतामा नपर्ने र कामको परिणाम नदेखिएकाले परिणाममुखी कामका लागि मन्त्रालय फुटाएको बताएका हुन् ।
आफू मुख्यमन्त्री भएपछि ८ मन्त्रालयबाट १४ मन्त्रालय पुर्याएको प्रसंग बताउँदै मुख्यमन्त्री पाण्डेले सहकारी, उद्योग, पर्यटन जस्ता क्षेत्रमा परिणाममुखी काम नभएको र अब सहकारीमा देखिएको विकृति, अपलपत्र अवस्थामा रहेका उद्योग जस्ता काममा सरकारले नै जिम्मा लिने गर्ने योजना रहेको बताए । यस अघि एउटै जिल्लाबाट धेरै जिल्ला हेर्ने गरी प्रदेशस्तरका कार्यालय राखिएको र त्यहाँबाट काम प्रभावकारी नभएको भन्ने गुनासो आइरको र अब बागमती प्रदेशका सबै जिल्लामा प्रदेशका कामलाई प्रभावकारी गराउनेका लागि एउटा÷एउटा कार्यालय राख्ने गृहकार्य भइरहेको मुख्यमन्त्रीले बताए ।
यस अघिकास सरकारले सुरु गरेका केही राम्रा कामहरुलाई तपाई मुख्यमन्त्री भएपछि रोक्ने काम गर्नु भयो नी, यो राम्रो काम हो त ? भन्ने पत्रकारको प्रश्नमा मुख्यमन्त्री पाण्डेले यस अघिका सरकारले धेरै कामहरु आधार विनाका काम, वजेट विनाका काम र प्रचारबाजीका लागि मात्रै ल्याइएका कार्यक्रम भएकाले त्यस्ता कार्यक्रमलाई तत्कालका लागि अगाडि नबढाउने निर्णय भएको स्पष्ट पारे ।
प्रदेश सरकारले बागमती प्रदेशमा रहेका १ सय १९ ओटा स्थानीय तहका दलित, अति विपन्न, पिछाडी पारिएको समुदाय मध्येबाट एक/एक जना बिद्यार्थीलाई तीन वर्षे प्राविधिक शिक्षा पढाएर त्यही स्थानीय तहमा रोजगार दिने, सामुदायिक कलेजमा पढ्न जाने छोरीहरुका लागि कलेज शुल्क सरकारले तिर्ने लगायतका महत्वपूण निर्णय भएको मुख्यमन्त्री पाण्डेले बताए । आफू मुख्यमन्त्री भएर आएपछि सरकारमा सहभागी सबै राजनीतिक दलहरुकै सहमतीमा सरकारका साझा कार्यक्रम ल्याइएको र तिनै साझा कार्यक्रमलाई कार्यन्वयन गराउने गरी सरकार अगाडि बढ्ने धारना राखे ।
