रामेछाप– रामेछापको दोरम्बा शैलुङ गाउँपालिकाले वैदेशिक रोजगारीलाई थप व्यवस्थित बनाउने भएको छ । आर्थिक वर्ष २०७६/०७७ बाट आफ्नो नीति तथा कार्यक्रममै वैदेशिक रोजगार सम्बन्धी ‘सामी रोजगार प्रवद्र्धन कार्यक्रम’ समावेश गरेर काम गर्दै आएको गाउँपालिकाले यस वर्ष देखि पालिकामा वैदेशिक रोजगारीको अवस्था कस्तो छ भन्ने वैदेशिक रोजगार सम्बन्धी छुट्टै पालिका प्रोफाइल बनाएर वैदेशिक रोजगारीलाई थप व्यवस्थति बनाउने भएको हो ।
शुक्रबार गाउँपालिकामा आयोजित सुरक्षित वैदेशिक रोजगार सम्बन्धी जनप्रतिनिधि तथा सरोकारवालाहरुसँगको अन्तरक्रिया कार्यक्रममा गाउँपालिका अध्यक्ष कमानसिंह तामाङले आफ्नो भनाई राख्दै गाउँपालिका भित्र वैदेशिक रोजगारीको अवस्था कस्तो छ ?, बैदेशिक रोजगारीलाई कसरी सुरक्षित बनाउन सकिन्छ ?, विदेशबाट फर्केका व्यक्तिहरुको सीपलाई प्रयोग गरेर गाउँपालिकामा भएको बेरोजगारीलाई कसरी कम गर्न सकिन्छ लगायतका विषय बस्तु समेटिएको तथ्यांक सहितको बैदेशिक रोजगार सम्बन्धी छुट्टै पालिका प्रोफाइल बनाउने कार्य सुरु हुन लागेकाले पालिकाभित्रको वैदेशिक रोजगारी थप व्यवस्थित हुने दावी गरेका छन् ।
गाउँपालिकाले विदेश जानेहरुको समस्यालाई प्राथमिकता राखेर सुरु गरिएको कार्यक्रमबाट पालिका भित्रका धेरै नागरिकहरुलाई सहयोग पुगेको अध्यक्ष तामाङको दावी रहेको छ ।
पालिकामा ‘सामी रोजगार प्रवद्र्धन कार्यक्रम’ लागु भएपछि रोजगारको लागि विदेश जाने युवाहरुले विदेशमा हुँदा आवश्यक पर्ने सूचनाहरु लिएर जान थालेको, केही व्यक्तिहरु सीप सिकेर जान थालेका लगायतका परिणामहरु देखिन थालेको मनोसामाजिक परामर्शकर्ता नोर्वु योञ्जनले जानकारी दिए । विदेशबाट फर्केका व्यक्तिहरु र उनिहरुको परिवारका सदस्याहरुमा वैदेशिक रोजगारीकै कारण गाउँपालिका भित्र देखिएका ३८ वटा मनोसामाजिक समस्या भएका व्यक्तिहरु भेटिएको र नियमित परामर्शा पछि ३२ जना सामान्य अवस्थामा फर्कीसकेको र बाँकी ६ जनासँग नियमित भेटघाट गरेर समस्या समधान गर्ने काम भइरहेको योञ्जनले बताए ।
कार्यक्रममा दोरम्बा शैलुङ गाउँपालिकाका प्रमुख प्रशासकीय अधिकृत धिराज मरासेनीले वैदेशिक रोजगर सम्बन्धी केकस्ता नियम तथा कार्यविधिहरु रहेका छन् र तिनको कार्यन्वयन कसरी भइरहेको छ लगायतको विषयमा जानकारी गराएका थिए । त्यस्तै हेल्भेटासका कार्यक्रम संयोजक भोजराज सुनुवारले रामेछप र समग्र नेपालको वैदेशिक रोजगारीको अवस्थाको बारेमा जानकारी गराएका थिए । डिप्रोस नेपालका क्षेत्रिय संयोजक सागरविक्रम बस्नेतले वैदेशिक रोजगारीबाट भित्रिएको विप्रेषण (रेमिट्यान्स) को अवस्थाको बारेमा जानकारी गराउँदै परियोजनाले विदेशबाट भित्रिएको विप्रेषण (रेमिट्यान्स) लाई थप व्यवस्थित बनाउन संचानल गरेको वित्तिय साक्षरता कार्यक्रमको बारेमा जानकारी गराएका थिए ।
प्रहार खबर साप्ताहिकमा कात्तिक १४ गते आइतबार प्रकाशित
