बोक्सेको भिरमा बोलेरो दुर्घटना हुँदा तीन जनाको मृत्यु, एक घाइते

रामेछाप– रामेछापको मन्थली नगरपालिका वडा नं ६ बोक्सेको भिरमा बोलेरो दुर्घटना हुँदा तीन जनाको ज्यान गएको छ भने एक जना बालक घाइते भएका छन् । काठमाण्डौबाट ओखलढुंगाको खिजीफलाटे तर्फ आउँदै गरेको प्रदेश नम्बर ३–०१–०२३ च ३५१३ नम्बरको बोलेरो विहिबार विहान बोक्सेको भिरमा दुर्घटना हुँदा चालक सहित बोलेरोमा सवार तीन जनाको घटना स्थलमै ज्यान गएको छ । बोलेरोमा सवार अर्का एक जना ७ वर्षका एक बालक घाइते भएका छन् ।

जिल्ला प्रहरी कार्यालय रामेछापका अनुसार मृत्यु हुनेहरुमा ओखलढुंगा जिल्लाको खिजीदेम्बा गाउँपालिका वडा नं. ६ खिजीफलाटेका ३५ वर्षका लाक्पा शेर्पा, ३२ वर्षकी फुर्वा शेर्पा र ३६ वर्षका वाङछु शेर्पा रहेका छन् । ७ वर्षका घाइते बालक पेम्बा शेर्पालाई दुर्घटना स्थलबाट उद्दार गरेर तामाकोशी अस्पतालमा सामन्य उपचार गरी थप उपचारको लागि कठमाण्डौ पठाइएको प्रहरीले जनाएको छ । बोलेरो सडकबाट करिव ६ सय मिटर तल खसेको थियो ।