‘युवा’ शब्दको अर्थ खोज्ने हो भने विश्वका अधिकासं देशहरुले मुलुक चलाउने संवैधानिक व्यवस्थामा नै उल्लेख गरेर मुलुकका लागि अति आवश्यक मानव शक्तिको रुपमा परिभाषित गरेका छन् । विश्व श्रमिक संगठनले १५ वर्ष देखि २९ वर्ष, युनिसेफ र विश्व स्वास्थ्य संगठनले १५ देखि २४ वर्ष उमेर समूहलाई ‘युवा’ भनेर परिभाषित गरेका छन् । नेपालमा ‘राष्ट्रिय युवा नीति– २०६६’ मा १६ देखि ४० वर्ष उमेर समूहका महिला, पुरुष तथा तेस्रो लिंगीलाई युवा भनेर परिभाषित गरेको छ । हाम्रो समाजले विगत देखि नै युवा समूहलाई हरेक कामका लागि बलियो समूह मान्दै आएको छ ।
गाउँको एउटा सानो समाज देखि राष्ट्रले समेत युवाको जोस र जागरलाई थप बलियो बनाउने गरी उच्च मूल्यांकन गरेर युवालाई सम्मान गरेको छ । तर हाम्रो मुलुकमा हरेक ठाउँको नेतृत्व लिने वा दिने बेला माथी उल्लेखित परिभाषा र भनाईहरुले पटकै सार्थकता पाउँदैनन् । त्यसै कारण पनि नेपाललाई अहिलेको अवस्थामा ल्याउन दशकौ वर्ष देखि निरन्तर रुपमा विभिन्न आन्दोलनमा महत्त्वपूर्ण भूमिका खेलेका युवाहरूको नेतृत्व गर्ने सपना र मुद्दाले अझै ठाउँ पाउन सकेका छैनन् भने नेपालका कुनै पनि राजनीतिक दलहरूले युवाशक्तिलाई नेतृत्वमा ल्याएको पाइदैन् । नेपालको सबै भन्दा पुरानो र लोकतान्त्रिक पार्टी नेपाली काँग्रेसको यहि भदौ १८ गते देखि सुरु भएको महाधिवेशनमा पनि नेतृत्वदायि भूमिकामा युवाहरुलाई नल्याउने संकेत देखिन थाली सकेको छ ।
कुनै सार्वजनिक मञ्चमा आफ्नो पार्टीको तर्फबाट भाषण गर्न उभिएका महत्वपूण जिम्मेवारीमा रहेका उमेरको परिभाषाले जेष्ठ नागरिक भइसकेका नेताहरु आफ्ना युवा कार्यकर्ताको गुणगान गाएर कहिल्यै पनि थाक्दैनन् । तर यथार्थमा मुलुकमा भएका सबै राजनीतिक दलले विगत देखि नै युवालाई आन्दोलन र शक्ति प्रदर्शनमा मुख्य हतियारको रुपमा प्रयोग गर्दै आएका छन् । जसको कारण देशमा केही परिर्वतन आउँछ भनेर बसेका लाखौँ युवाहरु आफ्नो देशप्रति वितृष्ण जागेर विदेश तिर पलायन हुन थालेका छन् ।
नेपाली काँग्रेसले देशको मुहार फेर्न सक्ने गरी आफ्ना प्रतिनिधिहरु छनौट गर्न लागेको यो महान चाड १४ औँ महाधिवेशनमा युवालाई एउटा मतदाता र आफ्नो पक्षमा मत तान्नको लागि मात्रै प्रयोग गर्यो भने नेपाली काँग्रेको मात्रै हैन देशकै भविष्य फेरि दशकौ वर्ष पछाडि धकेलिने छ । त्यसकारण १४ औँ महाधिवेशनमा विवेकपूर्ण तरिकाले कांग्रेसमा युवा नेतृत्व स्थापित गराउँदै देशलाई युवाको युगमा प्रवेश गराउनका लागि पनि काँग्रेसका सम्पूर्ण क्रियाशील सदस्यले वडा, गाउँ, नगर, प्रदेश क्षेत्र र जिल्ला तह देखि नै युवालाई छनौट गर्दै केन्द्रको नेतृत्व समेत युवाको हातमा दिलाउन जरुरी छ ।
प्रहार खबर साप्ताहिकमा भदौ २० गते आइतबार प्रकाशित
