रामेछाप- वडा तह देखि केन्द्रीय तह सम्म हुन लागेको नेपाली काँग्रेको १४ औँ महाधिवेशनमा निर्वाचनको मिति नजिकिदै जादा रामेछाप काँग्रेसमा पनि पार्टी सभापति देखि विभिन्न पदमा आगामी नेतृत्वको लागि काँग्रेस नेताहरुले उम्मेद्वरी घोषणा गर्न थालेका छन् । जिल्लाको पहिलो पद मानिने जिल्ला सभापतिमा दुई नेताले आगामी नेतृत्वका लागि पार्टी सभापतिको उम्मेद्वार रहेको औपचारिक घोषणा गरेका छन् ।
बुधबार मन्थली नगरपालिका वडा नं ४ सालु इकाइले आयोजना गरेको एक कार्यक्रममा नेपाली काँग्रेस रामेछापका बर्तमान पार्टी सभापति लवश्री न्यौपाने र महासमिति सदस्य पुर्ण बहादुर तामाङ ‘कान्छाराम’ ले पार्टी सभापतिको उम्मद्वार बन्ने औपचारिक घोषणा गरेका छन् । न्यौपानेले यस अघि कुनै पनि औपचारिक कार्यक्रममा आफू पार्टी सभापतिको उम्मेद्वार बन्ने घोषणा गरेका थिएनन् भने तामाङले ११ महिना अघि पत्रकारहरुसँगको भेटमा आफू रामेछाप जिल्लाको पार्टी सभापतिको उम्मेद्वार रहेको बताएका थिए ।
काँग्रेसको वडा कार्यालय उद्घाटन तथा पार्टी प्रवेश कार्यक्रमका विशिष्ट अतिथि समेत रहेका पुर्ण बहादुर तामाङ ‘कान्छाराम’ ले सभापतिमा आफ्नो उम्मेद्वारी कायम रहेको दोहो¥याउँदै पार्टी संगठन बलियो बनाउनका लागि आफ्नो उम्मेद्वारी रहेको बताए छन् । ‘गत निर्वाचनमा संघीय सासंदको उम्मेद्वार थिएँ, पार्टीको संगठन बलियो भएको भए मैले जित्ने रहेछु’ तामाङले भने,‘अब रामेछापका सबै स्थानीय तह, प्रदेश र प्रतिनिधिसभामा काँग्रेसलाई जिताउन र संगठन बलियो बनाउन मेरो उम्मेद्वारी हो ।’
अहिले सम्म रामेछापको पार्टी सभापति बन्नको लागि कसैले पनि उम्मेद्वरको घोषणा नगरेको बताउँदै आफू निर्विरोध सभापति पो बन्ने हो की ? भन्दै प्रश्न समेत गरेको थिए ।
तामाङले अहिले सम्म आफू मात्रै पार्टी सभापतिको उम्मेद्वार भएको बताएको केही बेरमा पार्टी सभापति एवं कार्यक्रमका प्रमुख अतिथि रहेको न्यौपानेले आफ्नो भनाई राख्दै १४ औँ महाधिवेशनमा रामेछाप काँग्रेस सभापतिमा आफ्नो पनि उम्मेद्वारी रहने बताएका छन् । सभापति न्यौपानेले लोकतान्त्रिक पार्टीको सुन्दर पक्ष निर्वाचन भएकाले काँग्रेसको १४ औँ महाधिवेशनमा नेतृत्वका लागि हुने निर्वाचनमा मतदातालाई आफ्नो विवेक प्रयोग गरेर नेतृत्व चयन गर्न आम मतदातालाई अनुरोध गरेका छन् ।
काँग्रेसको सबै भन्दा तल्लो तह मानिएको वडा अधिवेशन रामेछापमा भदौ २३ गते देखि सुरु हुँदै छ ।
