रामेछाप– पछिल्लो समय विभिन्न जनप्रतिनिधि तथा नगरपालिकाले प्रयोग गर्दै आएका सवारीसाधनलाई एम्बुलेन्सको विकल्पका रुपमा प्रयोग गर्न थालिएको छ । यसै क्रममा रामेछाप जिल्लाको रामेछाप नगरपालिकाको उपप्रमुखले प्रयोग गर्दै आइरहेको गाडीलाई एम्बुलेन्स बनाउने घोषणा गरेकी छिन् ।
नेपालमा तिब्र रुपमा फैलिइ रहेको कोरोना भाइरस रामेछाप नगरपालिकामा पनि फैलादो अवस्थामा रहेको र त्यसबाट आउने असहज परिस्थितिलाई समधान गर्न सहयोग पुग्ने अपेक्षा सहित उपप्रमुख सृजना खड्काले आफूले प्रयोग गर्दै आएको सुमोलाई एम्बुलेन्स बनाएकी हुन् । आइतबार एक सूचना जारी गर्दै कार्यवहाक नगर प्रमुख समेत रहेकी उपप्रमुख खड्काले नगरपालिकामा रहेका एम्बुलेन्सबाट मात्रै सेवा प्रवाह गर्न कठिन भएइरहेका अवस्थालाई मध्यनज गर्दै कोरोना भाइरसबाट आउन सक्ने जोखिमलाई न्यूनिकरण गर्न सहज होस भन्ने उद्देश्यले आफूले प्रयोग गर्दै आएको सुमोलाई कोभिड संक्रमित विरामी वोक्नको लागि प्रयोगमा ल्याइएको बताएको छ ।
उपप्रमुख खड्काले भनिन्– ‘हामी जनप्रतिनिधि हौँ, नगरबासीलाई जस्तोसुकै अफ्टेरो परेको बेला पनि हामीले सहयोग गर्नु पर्छ । अहिले त झन प्राणघातक रोग कोरोनाको महमारी चलेको छ । हामी चाहन्छौ जसरी भएपनि यसलाई नियन्त्रण गरौँ, नागरिकलाई बचौँ । त्यस कारण पनि आफूले प्रयोग गर्दै आएको सुमो गाडीलाई एम्बुलेन्सको रुपमा परिणत गरेको छु । यसले पनि थोरै सहयोग पुग्छ ।’
एम्बुलेन्स बनाइएको सुमो गाडीलाई (कोभिड मैत्री) कोभिडका विरामी बोक्न मिल्ने गरी सुरक्षित बनाउनको लागि नयाँ गोरख गण रामेछापले सहयोग गरेको छ ।
नगरबासीको स्वास्थ्य उपचारमा सहज गराउने गरी नगरपालिकाले एम्बुलेन्स खरिद गर्र्ने प्रक्रिया अगाडी बढाइसकिएको भएपनि कोरोना कै कारण अहिले तत्काल ल्यानउ नसक्दा कोरोना संक्रमितको दर दैनिक बढ्दै गएकाले थप आवश्यक परे आफूले प्रयोग गर्दै आएको गाडी पनि एम्बुलेन्स बनाउने योजना रहेको नगर प्रमुख नर बहादुर थापा मगरले बताएका छन् ।
रामेछाप नगरपालिकामा आइतबार सम्म २२ जना कोरोना भाइरसका सक्रिय संक्रमित रहेका छन् ।
