रामेछाप- रामेछाप नगरपालिकाले दुधमा आत्मनिर्भर बनाउन पशुपालक किसानहरुलाई गाई भैंसी सुत्केरी भत्ता वितरणको अभियान चलाएको छ । चालु आर्थिक वर्षमा रामेछाप नगरपालिकाले एक गाई वा एक भैंसी सुत्केरी भएका किसानहरुलाई प्रति किसान एक हजारका दारले भत्ता उपलब्ध गराउँदै नगरलाई दुधमा आत्मनिर्भर बनाउने अभियान चलाएको हो ।
रामेछाप नगरपालिका वडा नम्बर १ र ३ का पशुपालक किसानहरुलाई भत्ता वितरण गर्दै नगर उपप्रमुख सृजना खड्काले पशुपालक किसानलाई पशुपालनमा थप प्रेरित गर्न र दुधमा आत्मनिर्भर बनाउन गाई भैंसी सुत्केरी भत्ता वितरण गर्न सुरु गरिएको बताईन् । पशुपालक किसानलाई ब्यवसायिक रुपमा पशुपालन गर्न आग्रह गर्दै उपप्रमुख खड्काले त्यस्ता किसानलाई नगरपालिकाले सधैं सहयोग गर्ने प्रतिवद्धता समेत व्यक्त गरिन् ।
शुक्रबार वडा नं १ का ७१ जना र वडा नं ३ का ८० जना पशुपालक किसानहरुलाई भत्ता वितरण गरिएको र बाँकी वडाहरुमा क्रमशः वितरण गरिदै जाने रामेछाप नगरपालिकाको पशु शाखाले बताएको छ । गाई भैंसी सुत्केरी भत्ता पाउन किसानले सुत्केरी भएको गाई र बाच्छाबाच्छी वा भैंसी र पाडोपाडीको फोटो सहित सम्बन्धित वडाको सिफारीस समेत पशु सेवा शाखामा पेशग गर्नु पर्ने पशु शाखाले जनाएको छ ।
