रामेछाप– रामेछाप जिल्लामा कोरोना भाइरस विरुद्धको दोस्रो चरणको खोप आइतबार देखि लगाउन सुरु गरिने भएको छ । दोस्रो चरणमा थप २ हजार १ सय जनालाई कोरोना भाइरस विरद्धको खोप लगाइने स्वास्थ्य कार्यालय रामेछापका प्रमुख जितेन्द्र कर्णले बताए ।
कर्णका अनुसार रामेछाप जिल्ला अस्पतालमा आइतबार देखि मंगलबार सम्म तीन दिन र मन्थली प्राथमिक स्वास्थ्य केन्द्रमा सोमबार देखि शनिबार सम्म ६ दिन खोप लगाईने छ । दोस्रो चरणमा जिल्लामा भएका सबै सरकारी कार्यालयका कर्मचारी, सार्वजनिक संस्थानका कर्मचारीहरु, बैंकका कर्मचारीहरु, जनपथ प्रहरी, पत्रकार, स्थानीय तहका जनप्रतिनिधि र सिमा सुरक्षा पोष्टमा खटिएका सुरक्षाकर्मी रहेका छन् । त्यस्तै पहिलो चरणमा छुटेका स्वास्थ्यकर्मी, स्वास्थ्य स्वंयमसेवक, महिला स्वास्थ्य स्वंयमसेविका, एम्बुलेन्स तथा शव वाहन चालाक र शव व्यवस्थापनमा खटिएका सुरक्षाकर्मीहरु रहेका छन् ।
पहिलो चरणमा रामेछापका स्वास्थ्यकर्मीहरु, स्वास्थ्य स्वंयमसेवीका, एम्बुलेन्स तथा शव बाहन चालक गरी १ हजार ९३ जनले खोप लगाइ सकेका छन् ।
स्वास्थ्य कार्यालय रामेछापका प्रमुख जितेन्द्र कर्णले कोरोना भाइरस विरुद्ध लगाउन सुरु गरिएको खोप सुरक्षित भएकाले लक्षित वर्गमा परेकालाई ढुक्क भएर खोप लगाउन आग्रह गरेका छन् ।
