रामेछाप– रामेछाप नगरपालिकाले नगर भित्रका युवाहरुका लागि लोक सेवा आयोग द्वारा लिइने नायव सुब्बा, खरिदार वा सो सरहको परिक्षा तयारी कक्षा सुरु गरेको छ । नगरपालिकाले नगर क्षेत्र भित्रका ५० जना युवा सहभागी गराउने गरी सोमबार देखि १५ दिने लोक सेवा तयारी कक्षा सुरु गरेको हो ।
तयारी कक्षाको उद्घाटन गर्दै रामेछाप नगरपालिकाका उपप्रमुख सृजना खड्काले प्रशासनिक क्षेत्रमा रामेछाप जिल्लाका मानिसहरुको सहभागिता कमजोर रहेको र रामेछापका नागरिकले पनि प्रशासनिक क्षेत्रमा सहभागिता जनाउन सक्छन् भन्ने सन्देश दिनको लागि पनि युवाहरुलाई लक्षित गरी लोक सेवा तयारी कक्षा संचालन गरिएको बताइन् । उपप्रमुख खड्काले भनिन– ‘रामेछाप जिल्लामा क्षमता भएका सयौं युवाहरु हुनुनुहन्छ । तर, लोकसेवा तर्फ ध्यान नदिदा ठूल–ठूला अवसरहरु गुमाउनु परेको छ । जसको कारण प्रशासनकि क्षेत्रमा रामेछापका मानिसले केही पनि गर्न सक्दैनन् भन्ने किसिमको बुझाई अरु ठाउँका मानिसहरुलाई पर्न सक्छ । त्यसैले नगरपालिकाले नगर क्षेत्र भित्रका महिला पुरुष युवाहरुलाई लोकसेवाको बारेमा जानकारी गराउँदै मेहनत गर्न सके रोजगारी त्यता पनि छ भनेर उत्पे्ररण जगाउन यो तयारी कक्षा सुरु गरेका हौँ । आशा छ ५० जना मध्येका कोही न कोहीले नाम निकाल्नेछन् ।’
त्यस्तै प्रमुख प्रशासकिय अधिकृत रामचन्द्र लामगादेले आफ्नो अनुभव बताउँदै सहभागी प्रशिक्षार्थीहरुलाई समयको ख्याल गर्दै १५ दिनको तयारी कक्षामा सक्रिय सहभागिता जनाउन अनुरोध गरे ।
नगरपालिकाले यस अघि नगरपालिकाका ९ ओटै वडामा पुगेर लोक सेवा आयोग द्वारा लिइने नायव सुब्बा, खरिदार वा सो सरहको परीक्षा तयारी सम्बन्धी अभिमुखीकरण कार्यक्रमको आयोजना गरेको थियो । अभिमुखीकरण कार्यक्रममा ४ सय बढी युवाहरुले सहभागिता जनाएका थिए । तिनै सहभागीलाई प्रतिस्पर्धा गराएर ५० जना युवाहरु छनौट गरेर लोक सेवा तयारी कक्षा संचालन गरिएको रामेछाप नगरपालिकाका अधिकृत होम बहादुर थापाले बताए । थापाका अनुसार दैनिक विहान १० बजे देखि अपरान्हको ४ बजे सम्म कक्षा हुने छ ।
