रामेछाप– रामेछाप नगरपालिका वडा नं ५ रामपुरमा शुक्रबार देखि संचालन भएको प्रथम रामपुर वडाध्यक्ष कप– २०७७ पुरुष भलिवल प्रतियोगिता आइतबार सम्पन्न भएको छ । रामेछाप नगरपालिका वडा नं ५ रामपुरको चालु आर्थिक वर्षका लागि विनियोजित लक्षित कार्यक्रम अन्तरगतको युवा तथा खेलकुद शिर्षकबाट वडा कार्यालयले आयोजना गरेरको प्रथम रामपुर वडाध्यक्ष कप– २०७७ पुरुष भलिवल प्रतियोगिताको उपाधी लिना लाफा समूहले जितेको छ ।
रामेछाप– ५ रामपुरका १२ टिम सहभागी रहेको पुरुष भलिवल प्रतियोगितामा लिना लाफा समूह प्रथम, कोलोन्जोर ‘ए’ द्वितिय र नवजागरण ‘बी’ तृतिय भएका छन् । प्रतियोगितामा प्रथम हुने टिमले ३५ हजार नगदको साथमा शिल्ड, मेडल र प्रमाणपत्र प्राप्त गरेको छ । द्वितिय हुने टिमले २५ हजार नगदको साथमा मेडल र प्रमाणपत्र प्राप्त गरेको छ भने तृतिय हुने टिमले १५ हजार नगदको साथमा मेडल र प्रमाणपत्र प्राप्त गरेको छ ।
तीन दिन सम्म संचालन भएको प्रतियोगिता रामेछाप नगरपालिका– ५ रामपुरका वडाध्यक्ष भिम बहादुर तामाङको अध्यक्षता एवं रामेछाप नगरपालिकाका नगर प्रमुख नर बहादुर थापामगरको प्रमुख आतिथ्यतामा आइतबार सम्पन्न भएको छ ।
प्रतियोगिता समापन कार्यक्रममा बोल्दै रामेछाप नगरपालिकाका नगर प्रमुख नर बहादुर थापामगरले खेलकुदले मानिसलाई अनुशासित बनाउनुको साथै स्वस्थ जीवन जिउँन ठूलो मद्धत पुग्ने भएकाले मानिसको जीवनमा खेलकुद अत्यान्तै महत्वपूर्ण भएको बताए । नगर प्रमुख थापामगरले भने– ‘खेलकुदले मानिसलाई अनुशासित र स्वस्थ बनाउनुको साथै राष्ट्रलाई आवश्यक पर्ने नागरिक समेत उत्पादन गर्छ । त्यसैले खेलकुद क्षेत्र महत्वपूर्ण रहेको छ । रामेछाप नगरपालिकाले खेल क्षेत्रको विकासका लागि एक वडा एक खेल मैदन बनाउने गरी रणनीतिक योजनामै राखेर काम गरिरहेको छ । त्यति मात्रै हैन समग्र नगरपालिकालाई नै समेट्ने गरी सुविधा सम्पन्न कभर्ड हल निर्माण भइरहेको छ । यसले पनि रामेछाप नगरपालिकालाई खेलकुदकै माध्यमबाट विकास गर्न थप सहयोग पुग्छ ।’
कार्यक्रमका प्रमुख अतिथि समेत रहेका नगर प्रमुख थापामगरले रामेछाप नगरपालिकाले खेलकुदको लागि रामेछाप नगरपालिका, जिल्ला र अन्तराष्ट्रिय स्तरमा खेलकुदमा सहभागिता जनाउने खेलाडीहरुलाई विगतका वर्ष देखि नै सहयोग गर्दै आएको बताउदै आगामी दिनमा पनि पूर्ण रुपमा सहयोग हुने प्रतिबद्धता जनाए ।
त्यस्तै कार्यक्रममा बोल्दै रामेछाप नगरपालिका वडा नं ५ रामपुरका वडाध्यक्ष भिम बहादुर तामाङले रामपुरलाई खुलकुदकै माध्यमबाट चिनाउनको लागि र आगामी वर्षहरुमा खेलकुदलाई निरन्तरता दिनको लागि वडाध्यक्ष कपको आयोजना गरिएको बताए । उनले भने– ‘खेलकुदबाट पनि रामपुरलाई चिनाउन सकिन्छ । त्यसको लागि खेलकुदको विकास गर्न र खेललाई निरन्तरता दिनको लागि रामपुर वडाध्यक्ष कपको आयोजना गरेका हौँ । भविष्यमा जो कोही वडाध्यक्ष भएर आएपनि आज स्थापना गरेको रामपुर वडाध्यक्ष कपले निरन्तरता पाउँछ अनि हामीले खोजेको खेलाडी उत्पादन हुन्छन् । जसले गर्दा हामीले नगर, जिल्ला, देश र विदेशमा समेत सहजिलै प्रतिस्पर्धा गर्न सक्छौँ ।’
रामपुर जनसंख्या र भुगोलको हिसाबले रामेछाप नगरपालिकाको सबै भन्दा ठूलो वडा भएकाले सबैलाई वडाका सबै युवाहरुलाई समेट्ने गरी टोल–टोलमै खेल मैदन निर्माण गरेर खेलकुदमा आकर्षण गराउने गरी वडाले काम गरी रहेको वडाध्यक्ष तामाङले बताए ।
आगामी वर्ष संचालन हुने दोस्रो रामपुर वडाध्यक्ष कपमा ९ वटै वडाका टिम सभागी हुने गरी खुल्ला प्रतियोगिताको आयोजना गरिने पनि वडाध्यक्ष तामाङले उद्घोष गरे ।
कार्यक्रममा रामेछाप नगरपालिकाका प्रमुख प्रशासकीय अधिकृत रामचन्द्र लामगादे, वडा नं ६ ओख्रेनीका वडाध्यक्ष धन बहादुर खड्का, रामेछाप जिल्ला अस्पतालका अध्यक्ष रोशन पाख्रिन, नेकपा रामेछाप नगरपालिकाका अध्यक्ष मोतीलाल तामाङ, नेपाली काँग्रेसका युवा नेता सुशिलहरी बख्रेल लगायतले आफ्नो धाराण राख्दै नगरपालिकालाई खेलकुद कै माध्यमबाट विकास गर्न सबै एक जुट भएर लग्नु पर्नेमा जोड दिए ।
खेल रामेछाप नगरपालिका वडा नं ५ रामपुरले निर्माण गरेको खेल मैदनमा भएको हो ।
आफ्नो प्रतिकृया दिनुहोस्