रामेछाप– खाँडादेवी गाउँपालिकाले गत आर्थिक वर्ष र चालु आर्थिक वर्षको पहिलो चौमासिकको कार्यप्रगतिको समिक्षा गरेको छ । विहिबार गाउँपालिकामा आयोजित समिक्षा गोष्ठीमा गत आर्थिक वर्ष २०७६/९७७ र चालु आर्थिक वर्षको पहिलो चौमासिकको कार्य प्रगति प्रस्तुत गरिएको थियो ।
प्रस्तुत विवरण अनुसार गत आर्थिक वर्षमा कोरोना कहर बीच पनि निकाशा भएको बजेटको ८७.०८ प्रतिशत खर्च भएको छ । जसमा चालु बजेटको ९२ प्रतिशत र पुँजीगत बजेटको ८३ प्रतिशत खर्च भएको छ । त्यस्तै चालु आर्थिक वर्षको पहिलो चौमासिकमा पुँजीगत खर्च १६.९८ प्रतिशत मात्रै खर्च भएको छ भने चालु तर्फ २१.६६ प्रतिशत खर्च भएको छ ।
गत आर्थिक वर्ष र यस आर्थिक वर्षको पहिलो चौमासिकको आर्थिक प्रतिवेदन प्रस्तुत गर्दै लेखा अधिकृत अनन्त सापकोटाले कोरोनाको कारण यस वर्षको पहिलो चौमासिकमा लक्ष्य अनुसारको काम हनु नसकेको बताएका छन् ।
“शत प्रतिशत काम गर्ने उद्देश्य लिएर काम गर्ने जोसका साथ आगडि बढेको भएपनि कोरोनाको कारण अघिल्लो वर्ष सबै काम गर्न सकेनौँ, उपाध्यक्ष मखमली श्रेष्ठले भनिन्, ‘त्यसको असर हाम्रा विकासे बजेटमा प¥यो ।” समृद्ध गाउँपालिका बनाउनको लागि सबै आगमी दिनहरुमा एक जुट भएर लाग्नु पर्ने उपाध्यक्ष श्रेष्ठको भनाई रहेको थियो ।
कार्यक्रममा बोल्दै जिल्ला समन्वय समिति रामेछापका प्रमुख एवं कार्यक्रमका प्रमुख अथिति प्रेम बहादुर खड्काले जिल्लाका अन्य स्थानीय तह भन्दा खाँडादेवी गाउँपालिकाले नागरिकको पक्षमा राम्रा काम गरेको भन्दै आगमी दिनमा पनि त्यस्ता कामलाई निरन्तरता दिनु पर्नेमा जोड दिए । उनले स्थानीय सरकार नागरिकको नजिकको सरकार भएकाले नागरिकको समस्यालाई ध्यानमा राखेर धेरै काम गर्नु पर्नेमा पनि जोड दिए । त्यस्तै कार्यक्रममा बोल्दै नेकपाका नेता आनन्द श्रेष्ठले गाउँ विकासको लागि निजी स्वार्थहरु त्यागेर काम गर्न सके हामीसँग भएका थोरै श्रोतबाट पनि धेरै विकास गर्न सकिने बताए । एक पटक जनताबाट निर्वाचित भएर आएपछि पाँच वर्ष सम्म स्थायी रुपमा आफ्नै अधिकारहरु प्रयोग गर्दै काम गर्न सक्ने स्थानीय सरकार भएकाले जनप्रतिनिधिले जनताका अपेक्षा अनुसारका काम गर्नु पर्नेमा जोड दिए ।
कार्यक्रममा नेकपाका स्थानीय युवा नेता कृष्णहरि खत्री र नेपाल पत्रकार महासंघ रामेछापका अध्यक्ष रमेश ढुंगेलले पनि गाउँपालिकाले आफ्नो नारा पुरा गर्नको लागि नागरिकका समस्यालाई प्राथमिकतामा राखेर काम गर्नु पर्नेमा जोड दिएका थिए ।
कार्यक्रममा वडा नं १ देखि वडा नं ९ सम्मका वडाध्यक्षहरु, प्रमुख प्रशासकीय अधिकृत, कार्यपालिकाका सदस्य, राजनीतिक दल, पत्रकार, स्थानीय लगायतको सहभागिता रहेको थियो ।
