चुनावमा बोलेको बाचा पुरा गर्दै जनप्रतिनिधि, गाउँमै खुल्यो शहरी स्वास्थ्य केन्द्र

रामेछाप– स्थानीय तहको चुनावमा गाउँ गाउँ गएर भोट माग्ने उम्मेद्वारले भनेका थिएः ‘हामीलाई भोट दिनुसो, तपाईको गाउँमा खाने पानी ल्याउँछौँ, स्वास्थ्य, शिक्षा र विकास निर्माणको कामलाई पाँच वर्ष भित्रै पुरा गर्छौ ।’ नभन्दै अहिले स्थानीय सरकारका जनप्रतिनिधिले चुनावको बेला जनतामाझ गरेका बाचा पुरा हुँदै गएको महसुस गरेका छन् ।

बुधबार रामेछाप जिल्लाको रामेछाप नगरपालिका वडा नं ८ स्थित बाबियाखर्कमा शहरी स्वास्थ्य केन्द्रको सुरुत भएको घोषणा गर्दै रामेछाप नगरपालिकाका नगर प्रमुख नर बहादुर थापामगले भने– ‘आजबाट यहाँका स्थानीयले सामान्य स्वास्थ्य सेवा लिनको लागि घण्टौ लगाएर धेरै टाढा धाउनु पर्दैन् । तपाईहरुकै समस्याहरुलाई प्राथमिकतामा राखेर हामी काम गरीरहेका छौँ । यहाँको आवश्यकतालाई पहिचान गरेर नगरबाट थप कार्यक्रमहरु पनि ल्याउँछौँ । अन्य विकासे कार्यमा यहाँका स्थानीयले पनि साथ दिनु पर्‍यो ।’

शहरी स्वास्थ्य केन्द्र खुलेपछि यहाँका अशक्त, जेष्ठ नागरिक, गर्भवती महिला र सामान्य विरामी भएका नागरिकहरु बढी लाभन्वित हुन्छन्, वडाध्यक्ष केदार कार्कीले भने, ‘उपचारको लागि सदरमुकाम मन्थली र जिल्ला अस्पताल रामेछाप धाउनु पर्दैन् ।’ उनले थपे– ‘हामी निर्वाचनको बेला नागरिकको घर–घरमा जाँदा बोलेका थियौंः यहाँका नागरिकलाई सहज रुपमा स्वास्थ्य सेवा उपलब्ध गराउने, आज पुरा गरेका छौँ । वडामा अशक्त व्यक्तिहरु जटिल प्रकृतिका विरामी भए भने अस्पताल लैजनको लागि हामीले निःशुल्क एम्बुलेन्सको व्यवस्था गरेका छौँ ।’

अहिले शारदा संस्कृत मावि बावियाखर्कमा राखिएको भएपनि डुम्रीखर्का, बाबियाखर्क र सल्लेका स्थानीयलाई पायक पर्ने स्थानमा शहरी स्वास्थ्य केन्द्रको भवन बनेपछि त्यहीबाट सेवा संचालन हुने वडाध्यक्ष कार्कीले बताए । घर नजिकैबाट  स्वास्थ्य सेवा पाउने भएपछि स्थानीयले खुसी व्यक्त गरेका छन् ।