रामेछाप– रामेछापमा बाख्रा जोन कार्यक्रम प्रभावकारी बन्दै गएको छ । प्रधानमन्त्री कृषि आधुनिकीकरण परियोजना, परियोजना कार्यन्वयन इकाई रामेछापद्वारा संचालन भएको बाख्रा जोन कार्यक्रम मार्फत किसानहरुले बाख्रा पालनको लागि प्राविधिक साहयोगसँगै पचास प्रतिशत अनुदानमा बोयर जातका बोका र पाठी पाउने भएपछि बाख्रा जोन कार्यक्रम प्रभावकारी बन्दै गएको हो ।
अघिल्लो वर्षबाट शुरु गरिएको बाख्रा जोन कार्यक्रम मार्फत बाख्रा पालनको लागि आवश्यक प्राविधिक ज्ञान र पचास प्रतिशत अनुदानमा बोका–पाठी पाउने भएपछि हामी जस्ता सयौँ किसान यो जोनमा सहभागि हुनुभएको छ, बाख्रा जोनका संयोजक भिम बहादुर श्रेष्ठले भन्नुभयो, ‘अघिल्लो वर्ष जोनमा सहभागि समूह, सहकारी र कृषि फार्म सबैलाई ३० ओटा बोयर जातका दिइएको थियो । त्यसबाट किसानहरुले आम्दनी लिन थालिसक्नुभएको छ । यसरी हेर्दा एकै वर्षमा आम्दनी लिन थाल्नु यो कार्यक्रम सफलता तर्फ जानु हो ।’
उहाँले थप्नुभयो, ‘उन्नत जातको बोका पाठी खरिद गर्दा धेरै मूल्य पर्ने डरले हामीले थोरै समयमा धेरै आम्दनी हुने बाख्रा पाल्न सकेका थिएनौ, अहिले परियोजना आएपछि अनुदान दिँदा धेरै सहयोग भएको छ । अब हामी व्यवसायिक बन्ने तर्फ लागीसकेका छौँ ।’
‘बाख्रा जोन कार्यक्रम शुरु हुँदा हामीसँग केही सहकारी, कृषि समूह र कृषि मार्फ मात्रै सहभागि थिए । यस वर्ष कृषि फार्म, सहकारी र कृषि समूह गरी १ सय ३९ ओटा संस्थाहरु जोनमा सूचीकृत भएका छन, ‘परियोजना कार्यन्वयन इकाई रामेछापका प्रमुख होमनाथ लम्सालले भन्नुभयो, ‘यसरी समिति क्षेत्रमा संचालन भएको जोनमा यति धेरै संस्था सहभागी भएर काम गर्नु भनेको निकै राम्रो हो । अघिल्लो वर्ष ३० ओटा बोयर जातको बोका लाने किसानले यस वर्ष देखि आम्दनी लिन थालीसक्नुभएको छ । अघिल्लो वर्षको तुलनामा यो वर्ष धेरै किसानहरु सभागि हुनु भएको छ । अहिलेको कोरोना महामारीले पनि किसानहरु पशुपालन तर्फ आकर्षित हुँदै गएका छन् । जसको कारण पनि यो कार्यक्रम मार्फत किसानहरुको आयआर्जनमा बृद्धि हुने देखिन्छ ।’
कार्यालय प्रमुख होमनाथ लम्सालका अनुसार यो वर्ष सहभागि सहकारी, कृषि समूह र कृषि फार्महरुका लागि एक सय ओटा बोका–पाठी वितरण गरिने कार्यक्रम रहेको छ । सोही कार्यक्रम अन्तरगत मंगलबार १५ ओटा बोका र ११ ओटा पाठी वितरण गरिएको छ भने बाँकी रहेका सहकारी, कृषि समूह र कृषि फार्महरुलाई यहि महिना भित्र वितरण गरिने छ ।
अघिल्लो बर्ष देखि शुरु भएको बाख्रा जोन कार्यक्रममा मन्थली नगरपालिकाको वडा नं १, २, ३, ७, ८, ९, १०, ११, १२ र १३ रहेका छन् । त्यस्तै खाँडादेवी गाउँपालिकाको वडा नं १, २, ३, ४ र ५ सहभागि रहेका छन् भने सुनापति गाउँपालिकाको वडा नं ३, ४ र ५ रहेका छन् ।
आफ्नो प्रतिकृया दिनुहोस्