रामेछाप– कोरोना कहरबीचमा पनि गाउँका सरकारहरु आफ्ना नागरिकलाई दशैंको शुभकामना दिन सामाजिक सुरक्षा भत्ता बोकेर घर–घरमै पुग्न थालेका छन् । रामेछाप नगरपालिका वडा नं ७ सुकाजोरका जनप्रतनिधि कोरोनाको त्रासमा रहेका नागरिकको अवस्था बुझ्दै दशैंको शुभकामना सहित सामाजिक सुरक्षा भत्ता बोकेर घर–घरमै पुगेका हुन् ।
दशैं नजिकिएसँगै स्थानीयहरुलाई आर्थिक रुपमा समेत समस्या नहोस भन्ने उद्देश्यले कोरोना कहरबीच पनि आफ्ना नागरिकहरुको घरमै पुगेर भत्ता उपलब्ध गराईएको वडाध्यक्ष समिर कार्की बताउनुभयो । उहाँले भन्नुभयो–‘कोरोनाको त्रारमा रहेका नागरिकको अवस्था पनि थाहा हुने, उनिहरुको आर्थिक समस्या पनि टर्ने भएकाले स्वास्थ्य सुरक्षाका मापदण्ड पुरा गर्दै लक्षित वर्गका सबै नागरिकलाई उहाँहरुको घरमै पुगेर भत्ता उपलब्ध गरायौँ । यसले उहाँहरुलाई केही समय भएपनि राहत हुन्छ ।’
शुभकामना दिँदै वडाध्यक्ष कार्कीले कोरोना संक्रमण फैलन सक्ने भएकाले परिवारका सदस्य जहाँ छन् त्यही बसेर दशैं मनाउन सुझाएको बताउनुभयो ।
सामाजिक सुरक्षा भत्ता पाउनेमा सबै भन्दा बढी लोपउन्मुख हायु जाती ७ सय ३० जना, जेष्ठ नगरिक २ सय ६५ जना, एकम महिला ७९ जना, अपाङ्गता भएका व्यक्त ४० जना, दलित जेष्ठ नागरिक ५ जना र दलित बालबालिका ८ जना गरी सुकाजोरमा एक हजार एक सय २७ जनाले भत्ता पाएको वडा सचिब उत्तम कार्कीले बताउनुभयो । उहाँका अनुसार सामाजिक सुरक्षा भत्तामा मात्रै रामेछाप–७ सुकाजोरमा एक करोड ३३ लाख ८५ हजार खर्च हुन्छ ।
९ वटा वडा रहेको रामेछाप नगरपालिकामा भत्ता लिनेको संख्या सबै भन्दा बढी वडा नं ७ सुकाजोरमा रहेका छन् ।
