रामेछाप– रामेछाप नगरपालिका पूर्ण रुपमा विद्युतीकरण भएसँगै उज्यालो नगरमा परिणत भएको छ । नगरको केही भागमा मात्रै सिमित रहेको विद्युत स्थानीय तहका जनप्रतिनिधि निर्वाचित भएर आएपछि छोटो समयमा नै नगरका ९ ओटै वडा उज्यालो वडामा परिणत भएका हुन् । विहिबार रामेछाप नगरपालिकाको वडा नं ४ हिमगंगामा विद्युत बलेसँगै रामेछाप नगरपालिका पूर्ण रुपमा विद्युतीकरण भएको हो ।
रामेछाप नगरपालिकाको विषेश पहलमा नेपाल विद्युत प्राधिकरण रामेछापको सक्रियतामा नगरका सबै नागरिकको घरमा विद्युत पुर्याउन सफल भएको नगर प्रमुख नर बहादुर थापामगरले बताउनुभयो । उहाँले भन्नुमयो – ‘नगरका केही वडामा मात्रै विद्युत थियो, हामी निर्वाचित भएर आएपछि उज्यालो नगर बनाउने गरी विद्युतीकरणको कामलाई पहिलो प्राथमिकतामा राखेर विद्युत प्राधिकरणसँगको सहकार्यमा काम तिव्र रुपमा अगाडी बढायौँ । जसको कारण आज सबै नागरिकको घरमा विद्युत पुर्याउन सफल भएका छौँ ।’
उहाँले थप्नुभयो– ‘विद्युतीकरणले वडामा विकासका थप पूर्वधार पनि तयार पारेको छ । अब खानेपानीका ठूला लिफ्ट आयोजनाहरु संचालन गर्न, किसानहरुका लागि सिंचाई गर्न, साना उद्योगहरु संचालन गर्ने जस्ता काम गर्न पनि विद्युतीकरणले ठूलो सहयोग पुगेको छ । नगरलाई पूर्ण रुपमा विद्युतीकरण गरेर नगरलाई उज्यालो बनाउने गरी नागरिक माझ गरेका बाचा पुरा गरेका छौँ ।’ अब विद्युतलाई अधिकतम उपयोग गरेर थप विकासका कामहरु अगाडी बढाउँछौँ ।’
नगर प्रमुख थापा मगरका अनुसार रामेछाप नगरपालिकामा पूर्ण रुपमा विद्युतीकरण भएसँगै नगरका साँढे सात हजार घरपरिवारले विद्युत सेवा लिएका छन् ।
विपन्नलाई नगर प्रमुखको व्यक्तिग सहयोगमा मिटर जडन
रामेछाप नगरपालिकाको वडा नं ४ हिमगंगाका विपन्न परिवालाई नगर प्रमुख नर बहादुर थापामगरले विद्युत मिटर उपलब्ध गराउनुभएको छ । विहिबार हिमगंगाका २ सय ८३ घरपरिवालाई विद्युत मिटर वितरण गर्दा ८ घर परिवारले आर्थिक अभावका कारण मिटर खरिद गर्न नसकेपछि नगर प्रमुख थापामगरे आफ्नै खर्चमा मिटर खरिद गरिदिनुभएको हो । विद्युत मिटर वितरण कार्यक्रममा नेपाल विद्युत प्राधिकरण रामेछापका प्रमुख विनोद अधिकारी, वडा नं ४ का वडाध्यक्ष टुपेन्द्र तामाङ लगायतको सहभागिता रहेको थियो ।
आफ्नो प्रतिकृया दिनुहोस्